राष्ट्रपतिमा आफ्नै दलका नेता रामचन्द्र पौडेल निर्वाचत भएपछि नेपाली कांग्रेसका सभापति शेरबहादुर देउवाले पौडेललाई अँगालो मारेरै बधाई दिएका छन् ।

पौडेल निर्वाचित भएलगत्तै सामाजिक सञ्जालमा लेखेर बधाई दिएका देउवाले निर्वाचन परिणामको औपचारिक घोषणा कार्यक्रममा पौडेललाई भेटेरै बधाई दिएका हुन् ।

निर्वाचन परिणाम घोषणा कार्यक्रममा सबै नेताले देउवालाई कुरिरहेका थिए । अन्तिममा देउवा आएलगत्तै पौडेल आफ्नो सिटबाट उठेर देउवासँग अँगालोमा बाँधिएका हुन् । उभिएका देउवासँग पौडेल आफैं खुशी हुँदै अँगालिन पुगेका थिए ।

देउवाले पनि अँगालो हाल्दै राष्ट्रपतिमा विजयी भएकोमा बधाई दिए । 

निर्वाचित भएलगत्तै देउवाले ‘राष्ट्रपतिमा निर्वाचित हुनुभएकोमा मेरा मित्र रामचन्द्र पौडेलजीलाई हार्दिक बधाई तथा सफल कार्यकालको शुभकामना’ भनेर सामाजिक सञ्जालमा लेख्दै बधाई दिएका थिए । 

पौडेलले ३३ हजार ८०२ मत प्राप्त गरी एमालेका उम्मेदवार सुवासचन्द्र नेम्वाङलाई पराजित गरेका थिए । नेम्वाङले १५ हजार ५१८ मत पाएका छन् ।

राष्ट्रपति निर्वाचनमा राष्ट्रिय सभाका ५८, प्रतिनिधि सभाका २७२ र प्रदेश सभाका ५५० सांसद मतदाता थिए । जसमा संघीय संसद् (प्रतिनिधिसभा र राष्ट्रियसभा) का ३१३ तथा प्रदेश सभाका ८१८ सदस्यले भोट हालेका थिए । 

पौडेल चौथो कार्यकालका लागि राष्ट्रपतिमा निर्वाचित भएका नेता हुन् तर यसअघि लगातार २ कार्यकाल एमालेकी विद्या भण्डारी राष्ट्रपतिमा निर्वाचित भएकी थिइन् । यसैले पौडेल तेस्रो राष्ट्रपति हुन् ।

पहिलो राष्ट्रपति कांग्रेसबाटै डा. रामवरण यादव निर्वाचित भएका थिए ।

यसअघि पौडेल पूर्व संस्थापन अर्थात् कोइराला निकटको समूहमा थिए तर १४औं महाधिवेशनयता पौडेल देउवा निकट रहेका थिए । अन्ततः देउवासँगको यही निकटताले पौडेल राष्ट्रपति बन्न सफल भएका छन् ।