नेपाल कराँते महासंघको महाधिवेशन चितवनमा आज हुँदैछ । महाधिवेशन पटिहानीस्थित कबर्डहलमा हुनेछ ।

महाधिवेशनको तयारी अन्तिम चरणमा पुगेको महाधिवेशन समारोहका संयोजक किशोर भट्टराईले जानकारी दिए । महाधिवेशनमा सहभागी हुन प्रतिनिधिहरू चितवन आउने क्रम जारी छ ।

गत माघ १२ गते राष्ट्रिय खेलकुद परिषद्का पूर्व सदस्य सचिव युवराज लामाको नेतृत्वमा बनेको २१ सदस्यीय तदर्थ समितिलाई ९० दिनभित्र निर्वाचन गर्ने अधिकार दिएको थियो । त्यहीअनुसार स्थानीय तहदेखि प्रदेशसम्मको अधिवेशन सकेर साधारणसभा तथा अधिवेशन गर्न लागिएको अध्यक्ष लामाले जानकारी दिए ।

महाधिवेशनमा ७६ जना प्रतिनिधिसहित ८० जना सहभागी हुनेछन् । 

कराते महासंघको तदर्थ समितिका २१ जना, ७ प्रदेशबाट ५–५ जनाका दरले ३५ जना तथा महासंघमा आबद्ध ४ विधाहरू (सितेरियो, गोजुरियो, वादुरियो र सोतोकान) करातेबाट ५–५ जनाका दरले २० गरी कूल ७६ जनाले नयाँ कार्यसमितिका लागि मतदान गर्न पाउनेछन् ।

कराँतेको नयाँ विधानअनुसार २५ सदस्यीय कार्यसमिति चयन गर्नेछ । तीमध्ये हरेक प्रदेशबाट १–१ गरी ७ जना केन्द्रीय सदस्यलाई सम्बन्धित प्रदेशले नै चयन गरेर पठाउने छ । महाधिवेशनले अध्यक्ष, ७ उपाध्यक्ष, महासचिव, सचिव, कोषाध्यक्ष र ७ जना सदस्य रहेको समिति चयन गर्नेछ ।

विक्रम संवत् २०६९ सालमा महासंघ गठन भएको थियो ।