तीन दिनअघि ‘विशाल निरौला’ युट्युब च्यानलमार्फत ‘दिलवाली’ शीर्षकको म्युजिक भिडियो सार्वजनिक भयो ।

रचना रिमाल र मिलन मोक्तानको स्वर रहेको यसको भिडियोमा अभिनेता पल शाहसँगै जुम्ल्याहा दिदी बहिनी स्मारिका–समारिका ढकालको अभिनय एवं नृत्य छ ।

पल शाहको नयाँ म्युजिक भिडियो भनेर यो भिडियो सार्वजनिक गरिएको छ । यद्यपि, यो एक वर्षभन्दा अगाडि नै खिचिएको म्युजिक भिडियो हो । 

त्यस्तै, शुक्रवार मात्रै पनि ‘ओएसआर डिटिजल’मार्फत ‘तिमी संगै हुँदा...’शीर्षकको म्युजिक भिडियो सार्वजनिक गरिएको छ ।

प्रताप दास र अस्मिता अधिकारीको स्वर रहेको यसको भिडियोमा पनि पल शाहको अभिनय छ । दिनेश पाख्रिनको निर्देशनमा यो भिडियो तयार भएको हो । उनले यस भिडियोलाई नयाँ भनेर सार्वजनिक गरेका छन् । पहिले केही भाग खिचिएको भिडियोलाई अहिले पुरा गरेर सार्वजनिक गरिएको उनको दाबी छ । 

यतिबेला युट्युबमा पल शाहको अभिनय रहेका अन्य केही म्युजिक भिडियोहरू समेत सार्वजनिक गरिएको छ । यद्यपि, ति म्युजिक भिडियोहरू केही वर्ष अगाडि नै छायाँकन गरिएका हुन् । निकट स्रोतका अनुसार कारागारबाट रिहा भएपछि पल शाहले अहिलेसम्म कुनै पनि भिडियो सुटिङ गरेका छैनन् । 

एक वर्षको कारागार बसाइपछि पल गत महिना मात्रै रिहा भएका थिए । उनी ‘तिमीलाई हेर्ने बानी प¥यो’बोलको गीतको फिमेल भर्सनको भिडियोमार्फत कमब्याक गर्न लागेका छन् । उक्त गीतको रेकर्डिङ भइसकेको भने छायाँकन बाँकी छ । फिल्ममा पनि चाँडै फर्किने उनको तयारी छ ।

उनको म्युजिक भिडियो र फिल्मलाई लिएर दर्शकहरु प्रतीक्षामा छन् ।