वैशाख २० गते हुने उपनिर्वाचनमा बारा क्षेत्र नम्बर २ मा आफूले उम्मेदवारी नदिने लोसपा वरिष्ठ नेता राजेन्द्र महतोले बताएका छन्। 

पाँचदलीय गठबन्धनले बारा क्षेत्र नम्बर २ मा उपेन्द्र यादवलाई समर्थन गर्ने निर्णय गरेको छ। 

उनको दल उक्त पाँचदलीय गठबन्धनमा भएकाले पार्टीको निर्णयअनुसार उनले उम्मेदवारी नदिने बताएका हुन्। 

'पार्टी अध्यक्ष (महन्थ ठाकुर) ले नै यादवज्युलाई समर्थन गर्ने भनेपछि मैले विद्रोह गर्न हुँदैन,' महतोले लोकान्तरसँग भने, 'गठबन्धनबाट साझा उम्मेदवारका रूपमा उनलाई (यादव) बनाएपछि म ब्याक भएँ।' 

उनले आफू मात्र ब्याक नभएको, पार्टीले यसबारे निर्णय गरेपछि आफूले उपेन्द्र यादवलाई समर्थन गर्ने बताए। 

देशभरका ३ वटा निर्वाचन क्षेत्रमा उपनिर्वाचन हुँदैछन्। यसअघि उनले यादवसँग बारा २ मा प्रतिस्पर्धा गर्ने बताएका थिए। महतो गएको मंसिरमा भएको प्रतिनिधिसभा निर्वाचनमा सर्लाही क्षेत्र नम्बर २ बाट बाबुराम भट्टराई नेतृत्वको नेकपा समाजवादी  पार्टीका महिन्द्रराय यादवसँग पराजित भएका थिए। 

महतोले‍ उम्मेदवारी नदिने भएपछि यादवलाई केही सहज हुने देखिएको छ। उक्त क्षेत्रबाट निर्वाचित रामसहाय यादव उपराष्ट्रपति भएपछि यो क्षेत्र रिक्त रहेको थियो। 

भोलि (सोमवार) उम्मेदवारी दर्ता गर्ने निर्वाचन आयोगको कार्यतालिका छ।