मन्दीले खुम्चियो आर्थिक वृद्धिदर, यो वर्ष २.१६ प्रतिशतमा सीमित हुने

अर्थतन्त्रमा देखिएको मन्दीको असर आर्थिक वृद्धिदरमा पर्ने भएको छ । चालू आर्थिक वर्षमा देखिएको मन्दीको असरस्वरूप आर्थिक वृद्धिदर खुम्चिने भएको हो ।

राष्ट्रिय तथ्यांक कार्यालयले मंगलवार सार्वजनिक गरेको तथ्यांकअनुसार चालू आर्थिक वर्ष २०७९/८० को आर्थिक वृद्धिदर जम्मा २.१६ प्रतिशत मात्रै हुने अनुमान छ ।

गत आर्थिक वर्ष २०७८/०७९ मा नेपालको आर्थिक वृद्धिदर ५.५ प्रतिशत थियो । 

सरकारले ८ प्रतिशत आर्थिक वृद्धिको लक्ष्य राखेको भए पनि आर्थिक मन्दीका कारण लक्ष्यको तुलनामा झिनो अंकले मात्रै वृद्धिदर हासिल हुने भएको हो । 

विभागका अनुसार यो वर्ष उपभोक्ता मूल्यमा १.८६ प्रतिशत आर्थिक वृद्धि हुनेछ । अर्थतन्त्रको आकार ५३ खर्ब ८१ अर्ब रुपैयाँ पुग्ने प्रक्षेपण छ ।

अर्थतन्त्रको आकार पछिल्लो एक वर्षमा ५ खर्ब रुपैयाँले बढेको छ । गत वर्ष नेपाली अर्थतन्त्रको आकार ४८ खर्ब रुपैयाँको थियो ।