राष्ट्रिय गौरवका आयोजनाहरूको कार्यान्वयनलाई प्रभावकारी बनाउन सरकारले महत्त्वपूर्ण निर्णय गरेको छ । सफ्टवेयरबाट दैनिक अनुगमन गरेर राष्ट्रिय गौरवका आयोजनाहरू सम्पन्न गर्ने गरी ऊर्जा, जलस्रोत तथा सिँचाइ मन्त्रालयले विभिन्न निर्णयहरू गरेको हो ।

राष्ट्रिय गौरवका आयोजनाका प्रमुखहरूसहित मन्त्रालयमा आज बसेको बैठकले सफ्टवेयरमार्फत दैनिक अनुगमन गर्ने, आयोजनाहरूको कार्यान्वयन समन्वय संयन्त्र बनाउने र सबै आयोजनाहरूको पब्लिक अडिट गर्ने सहितका निर्णय गरेको छ । आयोजनाहरूको अवस्थालाई दैनिक अनुगमन गरी त्यसमा देखिएका समस्याहरूलाई तत्काल समाधान गर्ने निर्णय पनि मन्त्रालयले गरेको छ । आयोजनाहरूमा देखिएका स्रोत व्यवस्थापनका समस्याहरूलाई पनि समाधान गर्ने गरी मन्त्रालयले निर्णय गरेको छ ।

बैठकमा उर्जामन्त्री शक्तिबहादुर बस्नेतले राष्ट्रिय गौरवका आयोजनाहरुलाई छिटोभन्दा छिटो सम्पन्न गर्ने गरी कदम चाल्न आयोजनाका प्रमुखहरूलाई निर्देशन दिएका थिए । राष्ट्रिय गौरवका रूपमा सूचिकृत भएका आयोजनालाई अरू सामान्य आयोजनाका रूपमा लिन नहुने मन्त्री बस्नेतले बनाए । यी आयोजनाहरू अब तीव्र गतिमा अगाडि बढ्ने पनि उनले बताए ।

 मन्त्रालय अन्तर्गत सिँचाइका ६ वटा राष्ट्रिय गौरवका आयोजनाहरू छन् । जसमा महाकाली सिँचाइ आयोजना, रानी जमरा  सिँचाइ आयोजना, भेरी बबई डाइभर्सन आयोजना, बबई सिँचाइ आयोजना, सिक्टा सिचाई आयोजना, सुनकोसी मरिन डाइभर्सन आयोजना रहेका छन् ।