काठमाडौंको टोखाका २८ वर्षीय विश्वास अर्याल कास्कीको पोखराबाट बेपत्ता भएका छन् ।

गत वैशाख २८ गते काठामाडौंबाट पोखरा गएका उनी वैशाख २९ गतेदेखि बेपत्ता बनेका विश्वासका बुबा बुवा राजेन्द्रबन्धु अर्यालले जानकारी दिए ।

उनका अनुसार विश्वास पोखरा गएर विरौटास्थित फुपूको घरमा बसेका थिए ।

वैशाख २९ गते साँझ फुपूको छोरालाई साथमा लिएर साथीको दाइको बिहेको रिसेप्सन पार्टीमा गएका थिए । पार्टीबाट निस्किए पछि उनी बेपत्ता भएको राजेन्द्रबन्धुको भनाइ छ ।

विश्वास हराएपछि परिवारले प्रहरीमा खोजतलास गर्नका लागि उजुरी पनि दर्ता गराएको छ । तर उनको अवस्था पत्ता लाग्न सकेको छैन ।

छोरा नफर्केपछि राजेन्द्रबन्धुले वैशाख ३१ गते पोखरा पुगेर प्रहरीमा जाहेरी दिएका थिए । ‘अहिलेसम्म खोजतलास जारी छ । बाबु पत्ता पनि लाछैन । अरू केही घटना भएको भए प्रमाणित त्यस्तो आधार पनि छैन’, उनले भने ।
सीसीटीभी फुटेज हेर्दा विश्वास पालिखेचोकबाट राति साढे १० बजे नदीपुरतर्फ गएको देखिएको उनले जानकारी दिए ।

‘सीसीटीभी फुटेजमा दुई जना केटाले उसलाई घेरेर लगेको देखिएको छ’ विश्वासका बुबाले भने । त्यसपछि नदीपुर पुलमा उसको मोबाइल र पर्स खोसिन्छ । नदीपुरमै मोबाइल खोसिएपछि भेट्छु कि भनेर हेर्न आको जस्तो देखिन्छ’, सीसीटीभी फुटेजमा देखिएको दृश्यबारे विश्वासका बुबा राजेन्द्रबन्धुले भने ।

करिब १२ बजेको समयमा वडा कार्यालय नजिकै सीसीटीभी फुटेजमा देखिएका विश्वास त्यहाँबाट कता गए पत्तो नपाएको राजेन्द्रबन्धुले बताए ।

विश्वासको मोबाइल लुट्ने २ जनालाई पक्राउ गरेको जिल्ला प्रहरी कार्यालय कास्कीका सूचना अधिकारी डीएसपी श्रवणकुमार विकले बताए । तर बेपत्ता विश्वासको अवस्था पत्ता लाग्न सकेको छैन ।

जिल्ला प्रहरी कार्यालयबाट खटिएको टोलीले जेठ १ गते नदीपुरको पहेंलो पुलको मुनि विश्वास खसेको आशंकामा दिनभर खोजतलास गरिएको प्रहरीले जनाएको छ ।

नेपाली सेना, सशस्त्र प्रहरी र नेपाल प्रहरीको टोलीले सेती नदीको खोंचमा पनि उनको खोजी गरेको थियो । तर उनी नभेटिएको प्रहरीले जनाएको छ ।