राप्रपा नेपालका अध्यक्ष कमल थापाले राजनीतिक दलहरूले भन्ने गरेको समाजवादको उच्चतम परिभाषा सर्वे भवन्तु सुखिन, सर्वे सन्तु निरामया रहेको बताएका छन् ।

सोमवार काठमाडौंमा पार्टीले गरेको राप्रपा नेपालको हिन्दूराष्ट्रः अवधारणा र औचित्य अन्तर्क्रिया कार्यक्रमलाई सम्बोधन गर्दै उनले राजनीतिक दलहरूले अहिले भन्ने गरेको समाजवाद वैदिक कालमा नै व्याख्या गरिसकिएको बताए ।

उनले सर्वे भवन्तु सुखिन, सर्वे सन्तु निरामयाभन्दा समाजवादको उच्चतम र उत्कृष्ट परिभाषा अरु हुनै नसक्ने दाबी गरे । उनले सबै सुखी होऊन्, सबै समान होऊन्, कोही पनि दुःखी र रोगी नहोऊन् भन्ने कुरा वैदिक कालमा नै शास्त्रले व्याख्या गरिसकेकाले अहिलेका राजनीतिक दलहरू र संविधानमा लेखिरहनुको अर्थ नरहेको जिकिर गरे । उनले प्रजातान्त्रिक मूल्य र मान्यताको संरक्षणका लागि पनि नेपाल हिन्दूराष्ट्र हुनुपर्ने बताए ।

उनले हिन्दू राष्ट्रका कुरा गर्दा अहिलेका आधुनिक कुरालाई बहिष्कृत गर्ने नभई त्यसलाई पनि संरक्षण गरेर आर्थिक समृद्धिको दिशामा जान सकिने बताए ।

उनले भने, ‘हाम्रो सनातन संस्कृतिमा प्रजातान्त्रिक मूल्य र मान्यता छ । त्यसको संरक्षणका निमित्त पनि नेपाल हिन्दूराष्ट्र हुनुपर्छ । सामाजिक समन्वय, नैतिक मूल्य, उदार आर्थिक मान्यता, यो उदार आर्थिक मान्यता कतिपयले यो आधुनिक विश्वको उपलब्धिको रूपमा लिएका छन् । प्रजातन्त्र, डेमोक्रेसी र लिबरल इकोनोमीलाई एकअर्काका परिपूरकका रूपमा लिइरहेका छन् तर उदार आर्थिक मान्यता, समृद्धिको जुन कुरा छ, आर्थिक समृद्धिको कुरा मैले गरेको छु, त्यो समृद्धिको क्रममा अहिलेको लिबर इकोनोमीको आत्मा भनेको इण्टुभिजुअल फ्रिडम हो, त्यो इण्टुभिजुअल फ्रिडमको चर्चा त वैदिक कालमै भनेको छ । उपनिषद्हरूमा छ । हिन्दू राष्ट्रका कुरा गर्दा अहिलेका आधुनिक कुरालाई बहिष्कृत गर्ने होइन । त्यसलाई पनि हामीले संरक्षण गरेर आर्थिक समृद्धिको दिशामा जान सक्छौं । वसुधैव कुटुम्बकम धेरै चर्चा भइसकेको विषय हो । सर्वे भवन्तु सुखिन सर्वे सन्तु निरामया । आजकाल अधिकांश राजनीतिक पार्टीहरू समाजवाद भन्छन् । हुँदाहुँदा हाम्रो संविधानमा नै समाजवादउन्मुख लेखिएको छ, त्यो आवश्यक नै थिएन । सर्वे भवन्तु सुखिन, सर्वे सन्तु निरामया । सबै सुखी हुन्, कोही दुःखी नहुन्, कसैले दुःख नपाओस् भन्ने मान्यता नै हाम्रो वैदिक मान्यता हो । यही हो समाजवाद भनेको । जहाँ समानता हुन्छ । समाजवादको उच्चतम परिभाषा भनेकै सर्वे भवन्तु सुखिन, सर्वे सन्तु निरामया हो । योभन्दा अर्को उच्चतम, उत्कृष्ट परिभाषा हुनै सक्दैन ।’

अध्यक्ष उदार आर्थिक मान्यतालाई उपलब्धिको रूपमा लिने गरेको भए पनि यो कुरा वैदिक कालमा नै चर्चा भइसकेको बताए ।