नेपाली कांग्रेसका नेता डा. शेखर कोइरालाले सय किलो सुन तस्करी प्रकरणमा प्रधानमन्त्री पुष्पकमल दाहाल ‘प्रचण्ड’प्रति नै गम्भीर आशंका व्यक्त गरेका छन् ।

सुन तस्करीको अनुसन्धानमा राजस्व अनुसन्धान विभाग मात्रै संलग्न हुनु र प्रहरीको केन्द्रीय अनुसन्धान ब्यूरोलाई बाइपास गरिनुले आशंका जन्माएको उनको भनाइ छ । 

बिहीवार प्रेस युनियनले काठमाडौंमा आयोजना गरेको एक कार्यक्रमलाई सम्बोधन गर्दै नेता कोइरालाले राजस्व अनुसन्धान विभागलाई मात्र संलग्न गराई सुन तस्करी प्रकरणको अनुसन्धान गर्नु र नेपाल प्रहरीलाई बाहिर राख्नुले आशंका उब्जिएको बताएका हुन् ।

सुन समातिएको हप्ता दिन अघिसम्म प्रधानमन्त्री प्रचण्डका स्वकीय रहेका (नवराज ढुंगाना)लाई राजस्व अनुसन्धान विभागको प्रमुख बनाउनु र सुन तस्करी अनुसन्धानमा नेपाल प्रहरीको केन्द्रीय अनुसन्धान ब्यूरो (सीआईबी)लाई सहभागी नगराउनुले प्रधानमन्त्रीमाथि नै आशंका उब्जाएको उनको भनाइ छ ।

प्रहरीलाई अनुसन्धानमा संलग्न नगराई राजस्व अनुसन्धान विभाग मात्रै संलग्न गराउनुको कारण सञ्चारमाध्यमहरूले खोज्नुपर्ने कोइरालाले बताए । 

‘एउटा प्रकरण निस्किन्छ, त्यो इश्यु अघि बढाउँदै अर्को इश्यु आउँछ, पहिलाको इश्यु साइड लाग्छ । भुटानी शरणार्थीपछि ललितानिवास जग्गा प्रकरण आयो । भुटानी शरणार्थी प्रकरण रोकियो । झ्याप्प किन रोकियो भने माथि कोही न कोही मान्छे परिरहेको हुन्छ । सुन काण्ड आयो, मैले भनिरहनु पर्दैन, यो पनि सामसुम हुन्छ, किनभने माथिल्लो कोही इन्भल्व हुन्छ । सुनकाण्डमा त नेपालको बजार धेरै ठूलो छैन । यो काण्ड चल्दाचल्दै अर्को काण्ड निस्किन्छ, कुनै पनि काण्ड निष्कर्षमा पुग्दैन, किनभने माथिका मानिस सहभागी हुन्छन्,’ कोइरालाले भने, ‘सुन काण्डमा रोचक के छ भने सीबीआई इन्भल्ब छैन । राजस्व अनुसन्धान मात्रै इन्भल्व छ । सीआईबी इन्भल्व छैन, त्यो इन्ट्रेस्टिङ छ । राजस्व अनुसन्धान पहिला अर्थ मन्त्रालयको अन्डरमा हुन्थ्यो, ओलीजी प्रधानमन्त्री हुँदा प्रधानमन्त्री कार्यालयअन्तर्गत ल्याउनुभयो, शेरबहादुरजी आइसकेपछि उहाँले फर्काउनुभएन, अहिले प्रधानमन्त्रीजीले पनि फर्काउनुभएको छैन । त्यहाँ डीजी जो हुनुहुन्छ, सुनकाण्डभन्दा ७ दिन पहिला प्रधानमन्त्रीजीको पीए हुनुहुन्थ्यो, के हुँदैछ, कहाँ पुग्न खोज्दैछौँ ?’

नेता कोइरालाले सुन प्रकरणमा माथिल्लो तहका नेताहरूको संलग्नता रहेको आशंका गर्दै घटना सामसुम बनाउने प्रयास भइरहेको दाबी गरे । 

फरक प्रसंगमा कोइरालाले पार्टी सभापति शेरबहादुर देउवासँग आफू नमिलेको र बोलाएपछि मात्रै पार्टी सभापति कहाँ जाने गरेको बताए ।

उनले पार्टी सभापतिले गरेका गल्ती र कमजोरीहरूमा आफूले असहमति राखिरहेको स्पष्ट गरे । 

हेर्नुहोस्, भिडियो :