प्रधानमन्त्री निवास बालुवाटार रहेको ललितानिवासको सरकारी जग्गा हिनामिना प्रकरणको अनुसन्धान प्रतिवेदन बोकेर प्रहरीको केन्द्रीय अनुसन्धान ब्यूरो (सीआईबी)को टोली जिल्ला सरकारी वकिलको कार्यालय काठमाडौं पुगेको छ ।

सरकारी जग्गा व्यक्तिको नाममा लैजाने काममा संलग्नमाथि संगठित अपराध र कीर्तेको मुद्दा चलाउनुपर्ने रायसहितको अनुसन्धान प्रतिवेदन बोकेर सीआईबीको टोली सरकारी वकिलको कार्यालयमा पुगेको हो । 

आइतवार नै प्रतिवेदन बुझाउने तयारी रहेकोमा पूर्वप्रधानमन्त्रीद्वय माधव नेपाल र बाबुराम भट्टराईसँग कागज गर्नका लागि भन्दै आज (मंगलवार)सम्म 'होल्ड' गरिएको थियो । 

संगठित अपराधमा अनुसन्धानका लागि ६० दिनको समय हुने भएकाले भदौ ८ भित्र मुद्दा अभियोजन गरिसक्नुपर्ने बाध्यता छ ।

ललितानिवास प्रकरणमा सीआईबीले असार १२ गते भाटभटेनी सुपरमार्केटका सञ्चालक मीनबहादुर गुरुङसहितलाई पक्राउ गरेको थियो । त्यसको ६० दिन ८ गते पुग्दैछ ।