यस वर्ष तीज विशेष गीत विगतजस्तो धेरै संख्यामा सार्वजनिक भएनन् । 

अघिल्ला वर्षहरूको तुलनामा झण्डै ५० प्रतिशत कम तीज गीत सार्वजनिक हुँदा अधिकांशले चर्चा पाउन सकेनन् ।

यद्यपि, एकाध गीतले भने युट्युबमा राम्रो ‘भ्युज’ पाएका छन् ।

१. कमाउने नि हो, रमाउने नि हो...

युट्युबमा सबैभन्दा धेरै भ्युज पाउने यस वर्षको तीज विशेष गीत हो, कमाउने नि हो, रमाउने नि हो । यसमा खेम सेञ्चुरी र सुनिता बुढा क्षेत्रीले स्वर दिएका छन् । नेत्र अर्यालको शब्द रहेको गीतमा खेमकै संगीत, विनोद बाजुरालीको 'एरेन्ज' छ । 

यो गीत हालसालै सार्वजनिक गरिएको भने होइन, असारको अन्तिममा सार्वजनिक गीतमा गायक प्रकाश सपुत र मोडल जुना विश्वकर्माको नृत्य छ ।

भिडियोले तीजको दिनसम्ममा १ करोड ६० लाख प्लस भ्युज पाइसकेको छ । शंकर बिसीको कोरियोग्राफी एवं निर्देशन, नवराज उप्रेतीको छायांकन रहेको भिडियोलाई मनोज कार्कीले सम्पादन गरेका हुन् ।

यस गीतले टिकटकमा समेत निकै चर्चा पाएको छ ।

 २. अरेली काँडैले...

चर्चामा रहेको यस वर्षको अर्को तीज विशेष गीत हो, ‘अरेली काँडैले...’ । 

शान्तिश्री परियारको एकल स्वर रहेको यो गीत यतिबेला टिकटक, युट्युबदेखि तीजविशेष कार्यक्रममा निकै चर्चामा छ ।

एक महिनाअघि सार्वजनिक यस गीतले शुरूआती दिनमा भने खासै चर्चा पाएको थिएन, यद्यपि विस्तारै टिकटकमा गीत हिट भएसँगै युट्युबमा गीत हेर्ने र सुन्नेहरूको संख्या ह्वात्तै बढेको छ ।

तीजको दिनसम्म यस गीतको भिडियोलाई १ करोड ३३ लाख प्लसले हेरिसकेका छन् । 

नेत्र अर्यालकै शब्द र खेम सेञ्चुरीको संगीत रहेको यस गीतमा श्यामश्वेत रसाइलीको 'एरेन्ज' छ । यसमा गायक प्रकाश सपूत र मोडल अञ्जली अधिकारीले नृत्य एवं अभिनय गरेका छन् । 

सुनिल विकले यसको भिडियो निर्देशन गरेका हुन् । गम्भीर विष्टको कोरियोग्राफी, नवराज उप्रेतीको छायांकन, मिलन विश्वकर्माको सम्पादन रहेको भिडियो गायिका शान्तिश्रीकै अफिसियल युट्युबमा हेर्न सकिन्छ । 

३. जाले रुमाल फाट्यो...

गायक प्रकाश सपुतले यस वर्ष सार्वजनिक गरेको तीज विशेष गीत ‘जाले रुमाल फाट्यो’ले औसत चर्चा पायो । 

उनले ९ दिनअगाडि दुई वर्षअघि सार्वजनिक ‘कुरा बुझ्न पर्च’को दोस्रो भागका रूपमा समीक्षा अधिकारीको स्वरमा यस गीत ल्याएका थिए । 

आफ्नै शब्द एवं संगीतमा उनले ल्याएको गीतको भिडियोमा अभिनेत्री स्वस्तिमा खड्का र आँचल शर्माको अभिनय छ । 

साथमा अभिनेता गौरव पहारी, विशाल पहारीका साथमा प्रकाश स्वयंले अभिनय गरेका छन् । यो गीतले प्रकाशका अगाडिका गीतले जस्तो चर्चा पाएन । 

यद्यपि, गीत सार्वजनिक भएसँगै युट्युबको ट्रेन्डिङमा उक्लिन सफल रह्यो । सोमवारसम्म ६७ लाख भ्युज पाएको गीत अहिले पनि ट्रेन्डिङको पहिलो नम्बरमा छ । 

उनकै कथा, निर्देशन एवं निर्माण रहेको भिडियोलाई नवराज उप्रेतीले छायांकन र प्रविन भट्टले सम्पादन गरेका हुन् ।

४. तीज चाड नारीको ...

यस वर्ष चर्चामा रहेको अर्को गीत हो, ‘तीज चाड नारीको’ । डेढ महिनाअगाडि सार्वजनिक यो गीतको भिडियोले युट्युबमा ६१ लख प्लस भ्युज पाएको छ ।

यसमा १९ जना गायिकाको स्वर र त्यति नै संख्यामा मोडलको अभिनय हेर्न सकिन्छ । दुर्गा पौडेलको शब्द, खुमन अधिकारीको संगीत रहेको गीतलाई विनोद बाजुरालीले 'एरेन्ज' गरेका हुन् । 

गायक खुमन अधिकारी र सूर्य खड्काको पुरुष स्वर रहेको गीतमा शान्तिश्री परियार, समीक्षा अधिकारीदेखि अस्मिता डल्लाकोटीसम्मका १९ जना गायिकाले स्वर दिएका छन् । 

भिडियोमा पनि सम्झना बुढाथोकीदेखि करिश्मा ढकालसम्मका १९ जना मोडलले नृत्य गरेका छन् । शंकर बिसीको निर्देशन रहेको गीतले सार्वजनिक भएका शुरूआती दिनमा निकै चर्चा पाएको थियो । 

५. बलमा...

यस वर्ष धेरैले साउनमै तीजका गीत सार्वजनिक गरे । सार्वजनिकमध्ये अधिकांश तीज गीतले राम्रो चर्चा नपाउँदा स्रोता–दर्शकहरू विष्णु माझीको गीतको प्रतीक्षामा थिए ।

विष्णुले ११ दिन अगाडिमात्रै ‘पुतलीको भट्टी’ भाग १९ का रूपमा ‘बलमा...’ शीर्षकको गीत ल्याइन् । यद्यपि, उक्त गीत स्रोता दर्शकले अपेक्षा गरेअनुसार चर्चामा आउन सकेन । 

विष्णुकै श्रीमान् सुन्दरमणि अधिकारीको शब्द एवं संगीत रहेको गीतको भिडियोमा यसपटक विनु सुवेदीले नृत्य गरेकी छिन् ।

यो गीतले विगतमा जस्तो चर्चा पाउन सकेन । फलस्वरूप गीतको भ्युज पनि अपेक्षित रहन सकेन । यो समाचार तयार पार्दासम्म यस गीतले ५२ लाख हाराहारी भ्युज पाएको छ ।