विराटनगरमा प्रदेश स्तरीय सुरक्षा संयन्त्रको बैठक: गृहमन्त्री श्रेष्ठसहित प्रहरी प्रमुखहरू सहभागी हुने

शान्ति सुरक्षामा चुनौती बढ्दै गएपछि विराटनगरमा सुरक्षासम्बन्धी बैठक बस्दै छ । कोशी प्रदेशको सुरक्षासम्बन्धी छलफल तथा अन्तरक्रिया गर्न सोमबार विराटनगरमा प्रदेश स्तरीय सुरक्षा संयन्त्रको बैठक बस्न लागेको हो । 

बैठकमा उपप्रधान तथा गृहमन्त्री नारायणकाजी श्रेष्ठसहित तीनवटै सुरक्षा संयन्त्रका प्रमुखहरू सहभागी हुने छन् । पछिल्लो समयमा कोशीमा देखिएको शान्ति सुरक्षाको चुनौती र त्यहाँ देखिएका समस्याहरूको पहिचानका लागि गृहमन्त्री श्रेष्ठ, प्रहरी महानिरीक्षक बसन्त कुँवर, सशस्त्र प्रहरी प्रमुख राजु अर्याल, राष्ट्रिय अनुसन्धान विभागका प्रमुख र सांसदसहितले बैठकमा ब्रिफिङ लिने प्रदेश प्रहरी कार्यालय विराटनगरले जनाएको छ । 

कोशी प्रदेशको नामकरणपछि भइरहेको आन्दोलन र हिन्दुवादी संगठनले पछिल्ला दिनमा बढाएको चहलपहलबारे बैठकमा छलफल हुने प्रहरी उच्च स्रोतले जानकारी दियो । उनीहरू कोशी प्रदेशका विभिन्न ठाउँमा देखिएका समस्याको पहिचान तथा समाधान पहल गर्ने गरी तीन दिनसम्म कोशी प्रदेशमै रहने सुरक्षा स्रोतले जनाएको छ । 

सुरक्षासम्बन्धी छलफल गृहमन्त्री श्रेष्ठले बिहान साढे ८ बजे उद्घाटन गरेपछि कोशी प्रदेशको ६ जिल्लाका प्रमुखले जिल्लागत सुरक्षा अवस्थाबारे ब्रिफिङ गर्नेछन् । 

छलफलमा इलाम, झापा, धनकुटा, उदयपुर, सुनसरी र मोरङका प्रमुख जिल्ला अधिकारीहरूले जिल्लागत सुरक्षा अवस्थाबारे गृहमन्त्रीसहित सुरक्षा निकायका प्रमुखहरू समक्ष ब्रिफिङ गर्ने कार्यतालिका रहेको छ । 

जिल्लागत रूपमा सुरक्षा अवस्था प्रस्तुत गरेपछि तीनवटै सुरक्षा निकायका कोशी प्रदेशका प्रमुखहरूले त्यसपछि ब्रिफिङ गर्ने कार्यसूची तोकिएको छ । 

पहिलो सत्रको समापन गरेपछि सोमबार दिउँसो साढे १२ बजेपछि राजनीतिक दल नागरिक समाजसँग समसामयिक विषय र सुरक्षासम्बन्धी विविध विषयमा छलफल तथा अन्तरक्रिया गर्ने कार्यक्रम छ । 

अन्तरक्रिया कार्यक्रममा कोशी प्रदेशका सबै राजनीतिक दलका प्रतिनिधि, नागरिक समाजका प्रतिनिधिको उपस्थिति रहनेछ ।