अख्तियार दुरुपयोग अनुसन्धान आयोगले सुनसरीको रामधुनी नगरपालिकाका तत्कालीन उपप्रमुख र प्रमुख प्रशासकीय अधकृतसहित ९ जनाउपर भ्रष्टाचार मुद्दा दायर गरेको छ ।

पालिकाका तत्कालीन उपप्रमुख सविनाकुमारी चौधरी र प्रमुख प्रशासकीय अधिकृतसहित ओमकारप्रसाद न्यौपानेसहित लेखा अधिकृत द्वारिका प्साद दाहाल, इन्जिनियर देवेन्द्रनारायण चौधरी र सव-इन्जिनियर हर्षलाल चौधरीविरुद्ध सोमबार विशेष अदालत काठमाडौंमा भ्रष्टाचार मुद्दा दायर गरिएको अख्तियारका प्रवक्ता भोला दाहालले जानकारी दिए ।

उनीहरूले नगरपालिकाको वडा नम्बर ३ स्थित रामधुनी गेटबाट रामधुनी मन्दिर जाने मूल सडक कालोपत्रे गर्दा नियमितता गरेको अख्तियारको ठहर छ । कालोपत्रे सडक निर्माण कार्यमा वास्तविक भएको कार्यभन्दा बढी नापी किताबमा चढाई बढी भुक्तानी गरेको आयोगको ठहर छ ।

त्यस्तै वडा नं. ३ का तत्कालीन वडाध्यक्ष राजकुमार चौधरी, वडा नं. ३ का तत्कालीन वडा सदस्य टिकालक्ष्मी श्रेष्ठ र योजना शाखाका सहायक पाँचौ तहका सुनीलकुमार चौधरीले अनुगमनका क्रममा निर्माण कार्य सम्पन्न नहुँदै कार्य सम्पन्न भनी माइम्यूट गरी भ्रष्टाचार गरेको देखिएको आयोगले जनाएको छ ।

उनीहरूविरुद्ध दुई लाख १२ हजार ७३ रुपैयाँ बिगो र जरिवाना माग दाबी गरिएको छ ।