अरूको स्वामित्वमा रहेका गीतको म्युजिक ट्रयाक अनधिकृत रुपमा व्यावसायिक प्रयोग नगर्न राष्ट्रिय लोक तथा दोहोरीगीत प्रतिष्ठानले सबैमा ध्यानाकर्षण गराएको छ । ​

मंगलवार एक विज्ञप्ति जारी गर्दै प्रतिष्ठानले विभिन्न स्रष्टा, सर्जक, प्रस्तोता तथा उत्पादकहरुको स्वामित्वमा रहेको गीतको म्युजिक ट्रयाक अनधिकृत रुपमा व्यावसायिक प्रयोग नगर्न ध्यानाकर्षण गराएको हो । 

पछिल्लो समय देश तथा विदेशका स्टेज कार्यक्रममा म्युजिक ट्रयाकको अनधिकृत व्यावसायिक प्रयोग बढेको गुनासो आउने गरेको छ ।  गुनासो बढेपछि प्रतिष्ठानले ध्यानाकर्षण गराएको हो । 

व्यावसायिक प्रयोग गर्नुपर्ने भएमा सम्बन्धित अधिकार धनी स्रष्टा, सर्जक, प्रस्तोता तथा उत्पादकहरुले समझदारीमा लिखित अनुमति प्रत्यायोजन  गरेको अवस्थामा मात्र प्रयोग गर्न–गराउन समेत प्रतिष्ठानले अनुरोध गरेको छ । 

अनधिकृत रुपमा प्रयोग गरेको पाइएमा सम्बन्धित अधिकार धनीको माग बमोजिम असुल उपर, जरिवाना, दण्डसजाय हुनसक्ने कानुनी व्यवस्था रहेको भन्दै प्रतिष्ठानले सचेत समेत बनाएको छ । 

प्रतिष्ठान अध्यक्ष रीता थापा मगर, प्रतिष्ठान अन्तर्गतको विकृति विसङ्गति न्यूनीकरण विभागका संयोजक शिव हमाल र सह–संयोजक घनश्याम रिजालद्वारा हस्ताक्षरित विज्ञप्ति जारी गर्दै प्रतिष्ठानले यस्तो ध्यानाकर्षण गराएको हो ।