बिहीवारबाट मण्डला नाटक घरमा नाटक ‘पगला घोडा’ मञ्चन हुँदैछ । 

थिएटर आकारको प्रस्तुति रहेको नाटक माघ ६ गतेसम्म सोमबार बाहेक हरेक दिन मञ्चन हुनेछ । शनिवार भने दुई शो मञ्चन हुने जनाइएको छ । 

भारतीय सुप्रसिद्ध नाटककार बादल सरकारको कथा रहेको यस नाटक नेपाली भाषामा अनुवाद गर्दै मञ्चन गर्न लागिएको हो ।

नाटकको नेपाली अनुवाद शिव खाँड ठकुरीले गरेका हुन् । उनलाई अनुवादमा आलेख सुपरिवेक्षकको रूपमा कलाकार  तथा निर्देशक आशान्त शर्माले सहयोग गरेका छन् । 

नाटकलाई निर्देशक घनश्याम श्रेष्ठले निर्देशन गर्दैछन् । मञ्चमा भने कलाकारहरू प्रमोद अग्रहरी, मलिका महत, आशान्त शर्मा, विजय ताम्राकार, विम्ब अधिकारी लगायत देखिने छन् । 

नाटकमा सुष्मा कोइराला सहायक निर्देशक र शंकर भण्डारी स्टेज म्यानेजरको रूपमा रहेका छन् । नाटकको टिजर ओएसआर डिजिटलको युट्युबमार्फत सार्वजनिक भइसकेको छ । निकै आकर्षक प्रस्तुति रहेको टिजरलाई पिक्सेल स्क्वायरले निर्माण गरेको हो । 

२०६८ सालमा स्थापना भएको थिएटर आकारले थुप्रै नाटकहरू मञ्चन गरिसकेको छ ।