मोरङको सुन्दरहरैँचा– १० स्थित  सामुदायिक वनमा एउटा जंगली हात्ती मृत फेला परेको छ ।

जनजागरण सामुदायिक वनको मुनालझोडामा सोमवार बिहान जंगली हात्ती मृत फेला परेको हो ।

खोर्साने सिरानमा बस्तीको छेउमा हात्ती मृत फेला परेको इलाका प्रहरी कार्यालय बेलबारीले जनाएको छ । 

हात्तीलाई गोली हानेर मारिएको स्थानीयले जनाएका छन् ।

महिना दिन अगाडिदेखि बेलबारी, सुन्दरहरैँचा, पथरीशनिश्चरे, लेटाङलगायतका क्षेत्रमा ४ दर्जनको हाराहारीमा जंगली हात्ती बस्ने गरेका छन् ।

मृतक हात्ती  १० देखि १२ वर्ष उमेरको भएको डिभिजन वन कार्यालय मोरङले जनाएको छ । 

डिभिजन वन कार्यालय मोरङका प्रमुख विष्णु घिमिरेले घटनाका सम्बन्धमा अनुसन्धान थालिएको बताए ।

‘घटनास्थलमा कोसीटप्पु वन्यजन्तु आरक्ष  र सुन्दरहरैँचा नगरपालिकाका प्रतिनिधिदेखि भेटेरिनरी चिकित्सकसम्म आइसक्नुभएको छ,' घिमिरेले भने,  'अब पोस्टमार्टम गरेपछि मात्र गोली लागे/नलागेको थाहा हुनेछ ।' 

अनुसन्धानपछि थप कुरा खुल्ने उनले बताए ।