​नेपाली कांग्रेसका सभापति शेरबहादुर देउवाले लोकतान्त्रिक गणतन्त्रको विरुद्धमा वातावरण बनाउने प्रयास भएको भन्दै परिवर्तनगामी शक्तिबीच एकता हुनुपर्ने बताएका छन् ।

नेपाली कांग्रेसले ४८ औं राष्ट्रिय एकता तथा मेलमिलाप दिवसको अवसरमा काठमाडौंमा गरेको अन्तरक्रियामा सभापति देउवाले लोकतान्त्रिक गणतन्त्रको विकल्प अरू केही हुन नसक्ने भन्दै यसका विरुद्ध कोही लागे एक भएर प्रतिवाद गर्ने बताएका हुन् । 

‘अनेक बहाना खोज्नेहरू लोकतान्त्रिक गणतन्त्रको खिलाफमा वातावरण बनाउने प्रयासमा लागेका छन् । प्रधानमन्त्रीले पनि यस्तै भन्नुभएको छ । तर लोकतन्त्रको विकल्प अझै राम्रो लोकतन्त्र हो । लोकतन्त्रत्र र गणतन्त्रको विकल्प भनेको यसैलाई राम्रो बनाउने हो । अर्को होइन’, देउवाले भने, ‘यसमा हामी पार्टीहरू समान धारणामा छौं । राजा हटिसकेका छन्, फेरि फर्काउने कुरा हुन सक्दैन । हामी लोकतन्त्र  र गणतन्त्रका विषयमा एक ठाउँमा छौं । प्रधानमन्त्री प्रचण्ड, ओली हामी सबै एक ठाउँमा छौं । महत्वपूर्ण मुद्दामा छलफल भएर एक भएर अगाडि बढौं ।’​

देउवाले आज पनि देशमा बीपीको मेलमिलापको नीति उत्तिकै सान्दर्भिक भएको बताए ।

‘बीपी सानो देशको ठूलो मानिस हो । धेरै ठूलो आँट र हिम्मत गर्न सक्ने नेता हो । मारे मार्छ भनेर नेपाल फर्किने नेता हो’, देउवाले भने ।

पार्टीका लागि आफ्ना मतभेद बिर्सेर अगाडि बढ्नुपर्ने उनले बताए । ‘आफ्ना मतभेद, पार्टीका वैचारिक मतभेद, पार्टीगत प्रतिस्पर्धादेखि लिएर हाम्रा आफ्ना कुरा छन्’, देउवाले भने, ‘तर नेपालमा सबै पार्टीहरू एक ठाउँमा बस्ने संस्कार बनेको छ । धेरै कम देशमा यस्तो अभ्यास छ । विदेशबाट आउँदा पनि छक्क पर्छन् ।’ 

नेपालका दलबीच प्रतिस्पर्धा कडा हुने गरे पनि दलबीच एकता र भाइचारा हुनुमा बीपीको मेलमिलापको प्रभाव रहेको पनि देउवाले बताए ।