बुटवलमा माइक्रो बसको ठक्करबाट साइकल यात्रीको मृत्यु भएको छ ।

इलाका प्रहरी कार्यालय बुटवलका अनुसार बुटवलबाट भैरहवातर्फ जाँदै गरेको लु १ ख ३३७४ नम्बरको बसले साइकल यात्रीलाई ठक्कर दिँदा अन्दाजी ४० वर्षीय पुरुषको मृत्यु भएको प्रहरीले जनाएको छ ।​

मंगलवार दिउँसो बुटवल ८ मिलनचोकमा भएको उक्त दुर्घटनामा मृत्यु भएका व्यक्तिको सनाखत हुन नसकेको इलाका प्रहरी कार्यालय बुटवलका प्रहरी नायब उपरीक्षक (डीएसपी) विजयराज पण्डितले जानकारी दिए । ​​

पण्डितका अनुसार उनको घटनास्थलमै मृत्यु भएको थियो ।​​​​

ठक्कर दिने बस र चालक कृष्ण कंडेललाई प्रहरीले नियन्त्रणमा लिएको छ ।

साइकल यात्रीको शवलाई लुम्बिनी प्रादेशिक अस्पतालमा राखिएको छ ।