प्रमुख प्रतिपक्षी दल नेकपा (एमाले)ले राष्ट्रियसभा निर्वाचनका कोशी प्रदेशबाट ७ जनाको नाम सिफारिश गरेको छ । बिहीवार संघीय राजधानी काठमाडौंमा बसेको प्रदेशका पदाधिकारीको बैठकले ४ पुरुष र ३ जना महिलाको नाम सिफारिश गरेको हो । 

एमालेले उमानाथ ओली, हरिशचरण बानियाँ, परशुराम अधिकारी र कर्ण घलेको नाम सिफारिश गरेको हो ।

पूर्वप्राध्यापकसमेत रहेका ओली झापाका पुराना नेता हुन् भने बानियाँ पनि झापाकै पुराना नेता हुन् । अधिकारी नेकपा (माओवादी केन्द्र)बाट एमालेमा प्रवेश गरेका हुन् । यस्तै घले खोटाङका पुराना नेता हुन् । 

आगामी माघ ११ गते हुने राष्ट्रियसभा निर्वाचनमा कोशी प्रदेशका दुई सिटमा प्रतिस्पर्धा हुँदैछ । खुलातर्फ नेपाली कांग्रेसका रमेशजंग रायमाझी र महिलातर्फ माओवादी केन्द्रकी बिना पोखरेलको पदावधि सकिने भएकोले निर्वाचन हुन लागेको हो ।

प्रदेशमा गठबन्धन कायम भएमा आफ्ना उम्मेदवार पराजित हुने निश्चित रहेकोले पनि एमालेले पुराना नेताहरूलाई उम्मेदवार बनाएको नेताहरूको भनाइ छ ।  राष्ट्रियसभाका लागि कोशीमा स्थानीय तहका २७४ र प्रदेशका ९३ सांसद गरी कूल ३६७ मतदाता रहेका छन् । निर्वाचनमा प्रदेशसभा सदस्यको मतभार ५३ र स्थानीय तहका प्रमुख तथा उपप्रमुखको मतभार १९ रहेको छ । 

प्रदेशमा प्रदेशसभाका ९३ सांसदमा एमालेका ४०, कांग्रेसका २९, माओवादी केन्द्रका १३, राष्ट्रिय प्रजातन्त्र पार्टी (राप्रपा)का ६, नेकपा (एकीकृत समाजवादी)का ४ र जनता समाजवादी पार्टी (जसपा)का १ जना छन् । सांसदहरूतर्फ एमालेको २ हजार १२०, कांग्रेसको १ हजार ५३७, माओवादी केन्द्रको ६८९, राप्रपाको ३१८, एकीकृत समाजवादीको २१२ र जसपाको ५३ मतभार रहेको छ ।

१३७ पालिकाका २७४ मध्ये एमालेका ११०, कांग्रेसका ११५, माओवादी केन्द्रका ३१, राप्रपाका ४, एकीकृत समाजवादीका ७, जसपाका ४ र स्वतन्त्र ३ जना सांसद छन् । पालिकामा एमालेको २ हजार ९०, कांग्रेसको २ हजार १८५, माओवादी केन्द्रको ५८९, राप्रपाको ७६, एकीकृत समाजवादीको १३३, जसपाको ७६ र स्वतन्त्रको ५७ मतभार रहेको छ । 

प्रदेशमा एमालेको कूल मतभार ४ हजार २१०, कांग्रेसको ३ हजार ७२२ र माओवादी केन्द्रको १ हजार २७८ रहेको छ । यस्तै एकीकृत समाजवादीको ३४५, राप्रपाको ३९४, जसपाको १२९ र स्वतन्त्रको ५७ मतभार रहेको छ । गठबन्धन कायम रहँदा त्यसको पक्षमा ५ हजार ४८३ मतभार हुनेछ । एमालेको भन्दा १ हजार २६४ ले गठबन्धनको बढी रहेको छ । 

राष्ट्रियसभाअन्तर्गत कोशीमा २ सिट पद रिक्त हुँदैछन् । राष्ट्रियसभा सदस्य रमेशजंग रायमाझी र माओवादी केन्द्रकी बिना पोख्रेलको पदावधि आगामी फागुन २० गतेदेखि सकिँदैछ । कोशी एमालेले  दलित, अल्पसख्यक, महिला कोटाबाट ३ जनाको नाम सिफारिश गरेको छ । रुक्मिणि कोइराला, मेचीमाया धिमाल र रजनी मेचेको नाम सिफारिश गरेको हो । 

कांग्रेसले भने यसअघि नै कृष्णप्रसाद सिटौलासहित ३८ जना पुरुष तथा महिलातर्फ २५ जनाको नाम सिफारिश गरेको छ । सिटौलाको पक्षमा भने कांग्रेसले व्याख्यात्मक टिप्पणी गरेको छ । कांग्रेसले सिफारिश गर्दा ३ बुँदामा पूर्वमहामन्त्री सिटौलाको योगदानको चर्चा गरेको छ ।

‘सिटौलाले शान्ति प्रक्रियामा उल्लेखनीय योगदान पुर्याएको, संविधान निर्माणमा मस्यौदा समितिको सभापति भएको र अरू पार्टीसँग समन्वयात्मक भूमिका निर्वाह गर्ने गरेकाले राष्ट्रियसभा सदस्य निर्वाचन २०८० को उम्मेदवार उठाउन उपयुक्त देखिन्छ,’ उल्लेख गरिएको छ । 

कांग्रेसबाट सिफारिश हुनेमा सुजाता कोइराला, महेश आचार्य, मीनेन्द्र रिजाल, गुरुराज घिमिरे, उमेशजंग रायमाझी, तारामान गुरुङ, टंक राई, गिरिराज आचार्य, डिला संग्रौला लगायतका नेता छन् ।  यस्तै माओवादीले ७ जनाको नाम सिफारिश गरेको छ ।