नेपाल निर्माण व्यवसायी महासंघका अध्यक्ष रवि सिंहले सरकार आफ्नो प्रतिबद्धताबाट पछि हटेका कारण निर्माण उद्योगमा जटिल समस्या देखिएको बताएका छन् ।  चितवनको सौराहामा शनिवार निर्माण व्यवसायी महिलाहरूको चौथों राष्ट्रिय भेलाको उद्घाटन गर्दै अध्यक्ष सिंहले वार्ता र सहमतिबाटै निर्माण उद्योगको समस्या समाधानका लागि पहल भइरहेको बताए । 

 प्रधानमन्त्रीस्तरमै भएका सहमति कार्यान्वयन हुन नसक्दा निर्माण उद्योगको समस्या विकराल भएको अध्यक्ष सिंहले बताए ।  ‘निर्माण उद्योगमा स्वच्छ प्रतिस्पर्धा मार्फत् कार्टेलिङको अन्त्य हुनुपर्नेमा महासंघको वर्तमान नेतृत्व स्पष्ट रहेको छ’, उनले भने । महिला निर्माण व्यवसायीहरूको क्षमता अभिवृद्धिका लागि जस्तोसुकै सहयोग गर्न महासंघ तयार रहेको पनि उनले बताए । 

महासंघका वरिष्ठ उपाध्यक्ष इन्जिनियर आङ दोर्जी लमा (ए.डी) ले निर्माण व्यवसायीहरूको सदासयतालाई राज्यले कमजोरीको रुपमा लिए परिणाम गम्भीर हुन सक्ने बताए । 

यसैबीच भेलाले महिला निर्माण व्यवसायीहरूको क्षमता अभिवृद्धि र पेशागत सुरक्षाका लागि १० बुँदे घोषणापत्र पारित गरेको छ ।