मोरङको जहदा गाउँपालिका– १ बाट अपहरणमा परेका १० वर्षीय धनीधर राजवंशीको नेपाल प्रहरीले उद्धार गरेको छ । मंगलवार दिउँसो ३ बजेतिर अपहरणमा परेका उनको शुक्रवार विराटनगर– १५ बाट उद्धार गरिएको मोरङ प्रहरीले जनाएको छ । 

प्रहरीले अपहरणमा संलग्न ३ जनालाई पक्राउ गरेको हो । धनीधर जहदा– १ का वडाध्यक्ष बाबुराम राजवंशीका छोरा हुन् । धनीधरलाई घरनजिकको मन्दिरमा साथीहरूसँग खेल्न निस्किएका बेला अपहरण गरिएको मोरङ प्रहरीका प्रवक्ता डीएसपी रञ्जनकुमार दाहालले बताए ।  

‘स्कूलमा तिम्रो फोटो खिचाउनुपर्ने छ जाऊँ भन्दै ३ युवाले उनलाई साइकलमा राखेर लगेको पाइएको छ,’ लोकान्तरसँग उनले भने ।  

जहदा– १ का २० वर्षीय अभिषेक यादव, १९ वर्षीय मिथिलेशकुमार यादव र विराटनगर– १८ का २१ वर्षीय विवेकानन्द यादवले बालकलाई भाथीगछ पुर्याएपछि मोटरसाइकलमा राखेर विभिन्न स्थान हुँदै विराटनगर १८ को खाकीबाबा मन्दिर नजिक लगेको प्रवक्ता दाहालले बताए । अपहरणकारीहरूबीच विवाद भएपछि स्थानीयले र प्रहरीलाई खबर गरेका थिए ।

‘बालकलाई मोटरसाइकलमा बसाएपछि मिलन चोक, झोलुंगे पुल हुँदै विराटनगर– १४ र १८ को बाटोबाट वडा नम्बर १५ मा लगिएको खुलेको छ,’ उनले थपे । 

तीनै जनाको मिलेमतोमा बालकको अपहरण गरिएको प्रारम्भिक अनुसन्धानबाट खुलेको डीएसपी दाहालले बताए । पक्राउ परेकाविरुद्ध अपहरण तथा शरीर बन्धक मुद्दा चलाउन बुधवार अदालतबाट म्याद थप गरेर अनुसन्धान अघि बढाएको प्रहरीले जनाएको छ ।

बालकलाई अपहरण गर्नुको कारण खुलिनसकेको प्रहरीले जनाएको छ । बालकलाई भारत पुर्याउने योजनासहित अपहरण गरिएको हुनसक्ने प्रहरीको अनुमान छ । पक्राउ परेकाहरूले भने विराटनगरसम्म ल्याइदिएबापत कसैले आफूहरूलाई १–१ हजार रुपैयाँ दिने भनेपछि आफूहरूले बालकलाई लिएर आएको प्रहरीलाई बयान दिएका छन् । 

बालकलाई विराटनगरसम्म ल्याउन लगाउने मानिसका बारेमा खुलिनसकेको र घटना रहस्यमय बनेको प्रहरीले जनाएको छ ।