‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
नयाँ सत्ता समीकरण बनेसँगै त्यसको असर प्रदेश सरकारहरुमा समेत पर्न थालेको छ । एमाले र माओवादी केन्द्रको मुख्यमन्त्री भएका प्रदेशमा कांग्रेसका मन्त्रीहरुले राजीनामा दिन थालेका छन् भने कांग्रेसको मुख्यमन्त्री भएका प्रदेशमा माओवादीका मन्त्रीहरु बर्खास्त भएका छन् । 

कोशी, लुम्बिनी र मधेसबाहेकका प्रदेशमा यो सिलसिला चल्न थालेको हो । बागमती प्रदेशमा कांग्रेसका ६ जना मन्त्रीले बुधबार राजीनामा दिने तयारी गरेका छन् । यस्तै गण्डकी प्रदेशका मुख्यमन्त्री सुरेन्द्रराज पाण्डेले माओवादी मन्त्रीलाई बर्खास्त गर्दा कर्णालीमा कांग्रेसका मन्त्रीहरुले राजीनामा दिएका छन् । 
यसैगरी सुदूरपश्चिम प्रदेशका मुख्यमन्त्रीले माओवादीको मन्त्रीलाई बर्खास्त गर्दै आफैँले मन्त्रालय सम्हाल्न थालेका छन् । लुम्बिनीमा कांग्रेस नेतृत्वको सरकार धरापमा रहेको भएपनि हालसम्म बर्खास्त गर्ने या राजीनामा भएको छैन ।  
०००००
यसैगरी एमाले, माओवादीसहितका दलहरु मन्त्रालयको भागबण्डासहित समग्र पावरसेयरिङको छलफलमा जुटेका छन् । त्यसअघि सत्ता पक्ष गठबन्धनमा दलको संख्या बढाउने रणनीतिमा पनि देखिन्छ । हाल माओवादी, एमाले, जसपा र रास्वपामात्रै गठबन्धनमा रहेकामा एकीकृत समाजवादीलगायतका दललाई भित्र्याउने रणनीति देखिन्छ ।

जसअनुसार प्रधानमन्त्री प्रचण्ड र एमाले अध्यक्ष केपी ओलीले एकीकृत समाजवादीका अध्यक्ष माधव नेपालसँग भेटवार्ता गरेका थिए । नेपालले सकारात्मक जवाफ दिँदै बुधबार आवश्यक निर्णय गर्ने बताउँदा जनमत, नागरिक उन्मुक्ति पार्टी र लोसपासँग पनि सहकार्यबारे छलफल भइरहेको छ । आइतबार राति माओवादीले कांग्रेस नेतृत्वको गठबन्धन तोडेर एमालेसँग सत्ता सहकार्यको सहमति गरेको थियो । 
००००
नेपाली कांग्रेसले सरकारलाई दिएको समर्थन फिर्ता लिने निर्णय गरेको छ । मंगलवार साँझ सभापति शेरबहादुर देउवाको बूढानीलकण्ठस्थित निवासमा बसेको केन्द्रीय कार्यसम्पादन समितिको बैठकले सरकारलाई दिएको समर्थन फिर्ता लिने निर्णय गरेको हो ।
००००
सोमवार सकारात्मक सर्किट लागेर कारोबार समय अगावै बन्द भएको नेपाल स्टक एक्सचेन्ज परिसूचकमा मंगलबार उच्च अङ्कको गिरावट देखिएको छ ।
नेप्से परिसूचक ७० दशमलव ३१ अङ्कले घटेर दुई हजार सात दशमलव ६९ को विन्दुमा कायम भएको हो ।
००००
राष्ट्रिय प्रकृति संरक्षण कोषका सदस्य सचिव शरदचन्द्र अधिकारीलाई पदमुक्त गर्न राष्ट्रिय सतर्कता केन्द्रले कोषका अध्यक्षलाई निर्देशन दिएको छ ।
कोषका कार्यकारी प्रमुख समेत रहेका अधिकारीको नियुक्ति नै गैरकानूनी रहेकाले पदबाट बर्खास्त गर्न केन्द्रले सचिवस्तरीय निर्णय गर्दै निर्देशन दिएको हो ।
००००
नेकपा एमाले संसदीय दलको प्रमुख सचेतकमा महेश बर्तौला र सचेतकमा सुनिता बराल चयन भएका छन् ।
पार्टी अध्यक्ष एवं संसदीय दलका नेता केपी शर्मा ओलीले उनीहरूलाई  उक्त जिम्मेवारी दिएका हुन् ।
००००
नेपाली सुनचाँदी बजारमा सुनको मूल्यले नयाँ रेकर्ड बनाएको छ ।
सुनचाँदी बजारमा मंगलबार छापावाल सुनको मूल्य प्रतितोला रु एक लाख २३ हजार निर्धारण गरिएको छ ।
००००
महाशिवरात्रि पर्वलाई लक्षित गरी पशुपतिनाथ मन्दिर क्षेत्रमा मासुजन्य पदार्थ एवं मदिरा बिक्रीमा रोक लगाइएको छ । 
यही फागुन २५ गते शुक्रवार परेको महाशिवरात्रि पर्वलाई मध्यनजर गरेर यस्तो निर्णय गरिएको हो ।