सरकारले अरूको अधिकार हनन् नहुने गरी मर्यादित र अनुशासित ढङ्गले फागु पूर्णिमा (होली) पर्व मनाउन अनुरोध गरेको छ ।

जिल्ला प्रशासन कार्यालय काठमाडौंले मंगलवार विज्ञप्ति जारी गर्दै होलीको दिन गैरकानूनी क्रियाकलाप नगर्न आग्रह गर्दै गरेमा प्रचलित कानूनबमोजिम कारबाही गर्ने चेतावनीसमेत दिएको छ । 

‘आफ्नो अधिकारको उपयोग गर्दा अरूको अधिकार हनन् नहुने गरी मर्यादित, अनुशासित एवम् व्यवस्थित ढङ्गले सांस्कृतिक पर्व मनाउन हुन अनुरोध छ,’ सहायक प्रमुख जिल्ला अधिकारी हरिप्रसाद शर्माले जारी गरेको विज्ञप्तिमा भनिएको छ, ‘कोही कसैले यस्ता अमर्यादित, उच्छृङ्खल, अवाञ्छित एवम् गैरकानूनी क्रियाकलाप गरेमा प्रचलित कानूनबमोजिम कारवाही भइजाने व्यहोरासमेत सूचित गरिएको छ ।’

जबरजस्ती रङ दल्ने तथा अति उत्तेजित भई भागदौड गर्दा दुर्घटनामा परी ज्यानसमेत जान सक्ने भएकाले यस्ता अमर्यादित कार्य नगर्न र नगराउन जिप्रका काठमाडौंले अनुरोध गरेको छ ।

‘चाडपर्वको यस अवसरमा शान्ति सुरक्षामा असर पर्ने गरी सार्वजनिक स्थानमा होहल्ला एवम् झैझगडा गर्ने, मादक पदार्थको सेवन गरी पारिवारिक एवम् सामाजिक जनजीवन तथा सार्वजनिक मर्यादा र शान्ति खलल गर्ने, कसैको इच्छा विपरीत रंग एवम् पानीको लोला हान्ने, पानीको फोहोरा हान्ने, जबरजस्ती रङ दल्ने, अति उत्तेजित भई भागदौड गर्दा दुर्घटनामा परी ज्यानसमेत जान सक्ने हुँदा यस्ता अमर्यादित कार्य नगर्न नगराउन सबैमा अनुरोध छ,’ विज्ञप्तिमा उल्लेख छ ।

यस वर्षको होली पर्वको मुख्य दिन चैत ११ र १२ गते परेको छ । ११ गते हिमाली तथा पहाडी र १२ गते तराई–मधेशका जिल्लामा होलीको सार्वजनिक बिदा दिइएको छ ।

हेरौं विज्ञप्तिः