रक्षामन्त्री हरिप्रसाद उप्रेतीले जङ्गी अड्डाको निरीक्षण भ्रमण गरेका छन् ।

मन्त्री बनेपछि उनले आज जङ्गी अड्डा पुगेर नेपाली सेनाको बारेमा औपचारिक जानकारी लिएका हुन् । 

जङ्गी अड्डामा आयोजित कार्यक्रममा मन्त्री उप्रेतीलाई नेपाली सेनाको सङ्गठनात्मक स्वरूप, तैनाथी, स्वदेश र अन्तर्राष्ट्रिय क्षेत्रमा सेनाले सञ्चालन गरिरहेका विविध गतिविधिहरूका बारेमा जानकारी गराइएको थियो ।

निरीक्षण भ्रमणमा पुगेका नवनियुक्त मन्त्रीलाई प्रधानसेनापति प्रभुराम शर्माले बधाईसहित स्वागत गरेका थिए ।

कार्यक्रममा मन्त्री उप्रेतीले राष्ट्रिय स्वतन्त्रता, सार्वभौमिकता, भौगोलिक अखण्डता, स्वाधीनता तथा राष्ट्रिय एकताको रक्षार्थ नेपाली सेनाले निर्वाह गर्दै आएको भूमिका महत्वपूर्ण रहेको बताए ।

साथै विकास निर्माण, विपद् व्यवस्थापन, नागरिक सहयोग, खेलकुद एवं विश्व शान्ति स्थापनामार्फत अन्तर्राष्ट्रिय क्षेत्रमा नेपालको पहिचान स्थापित गराउन नेपाली सेनाले महत्त्वपूर्ण भूमिका निर्वाह गरेको बताए ।

यस्तै प्रधानसेनापति शर्माले संविधान प्रदत्त जिम्मेवारीका अलावा नेपाल सरकारबाट प्राप्त विकास निर्माणलगायत विविध जिम्मेवारीहरू समयमा नै पूरा गर्न सेना सदैव कटिबद्ध रहेको बताए ।

उक्त जिम्मेवारीहरू पूरा गर्ने क्रममा आई पर्ने चुनौतीहरूलाई नियमसम्मत मन्त्रालयबाट सम्बोधन हुँदै आएको उनले बताए ।