ललितपुरको ढोलाहिटीमा दुई समूहबीच झडप हुँदा दुई जनाको मृत्यु भएको घटनामा प्रहरीले ४ जनालाई पक्राउ गरेको छ ।

पक्राउ गरी मुद्दा चलाइएका ४ जनालाई आज प्रहरीले सार्वजनिक गरेको हो ।

पक्राउ पर्नेमा ललितपुर २६ जैनखेल बस्ने खोटाङका ३१ वर्षीय विजय राई, खोटाङकै ३० वर्षीय सुलभ राई, भोजपुरका ३८ वर्षीय विशालहाङ मुकारुङ राई र काठमाडौं गोकर्णेश्वरका २५ वर्षीय छेङ्वीहाङ राई रहेका छन् ।​

पक्राउ परेका विजय र सुलभ डी पोपिना खाजाघरका सञ्चालक हुन् ।

यस्तै घटनाको मुख्य प्रतिवादीलाई भगाउने १ जना फरार रहेको र उनको खोजीकार्य जारी रहेको प्रहरीले जनाएको छ ।​​​​​​

गत आइतवार राति होली खेलेर ढोलाहिटीस्थित डी पोपिना खाजाघरमा पुगेर युवाबीच चक्कु हानाहान भएको थियो ।​​​ 

दुई समूहबीच झडप हुँदा सुनसरीको धरान घर भई हाल ढोलाहिटी बस्ने २८ वर्षीय रोवस राई र पाँचथर जिल्ला घर भई हाल खुमलटार बस्ने ३० वर्षीय पुजन राईको मृत्यु भएको थियो ।

घटनामा संलग्न रहेको आरोपमा अन्य केहीलाई पनि नियन्त्रणमा लिएर सोधपुछ भइरहेको प्रहरीले जनाएको छ ।