मकाउ पठाइदिने भन्दै २० लाख ठगी, एक जना पक्राउ

मकाउ पठाइदिन्छु भन्दै ठगी गर्ने एक जनालाई प्रहरीले पक्राउ गरेको छ । पक्राउ पर्नेमा सोलुखुम्बु दुधकोशी गाउँपालिका-४ घर भई काठमाडौं बूढानीलकण्ठ नगरपालिका-११ कपन बस्ने ३४ वर्षीय सन्तोष गुरूङ रहेका छन् । 

उनलाई आइतबार प्रहरीले पक्राउ गरेको हो । काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई काठमाडौं बूढानीलकण्ठ नगरपालिका-११ कपनबाट पक्राउ गरेको हो ।

गुरूङले १० जनालाई वैदेशिक रोजगारमा आकर्षक तलबको प्रलोभन देखाई मकाउ पठाईदिन्छु भन्दै पीडितहरूबाट २० लाख ८५ हजार रूपैयाँ ठगी गरेको खुल्न आएको प्रहरीले जनाएको छ । 

उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको प्रहरीले जनाएको छ ।