स्थानीय तहहरूले आफ्ना नागरिकहरूलाई खुसी बनाउन विभिन्न उपाय अपनाउन थालेका छन् । करमाथि कर थुपारिएको भन्दै सरकारप्रति नागरिक रुष्ट बनिरहेका बेला केही स्थानीय तहले भने नयाँ जुक्ति लगाइरहेका हुन् । 

यसै मेसोमा सुनसरीको इटहरी उपमहानगरपालिकाले सेवाग्राहीलाई निःशुल्क कफी खुवाउने गरेको छ । 

त्यसमा पनि व्यवस्थित प्रतीक्षालय नै बनाएर त्यहाँ सेवाग्राहीलाई निःशुल्क कफी खुवाउने गरेको हो । यतिमात्र होइन उपमहानगरले एसीसहितको प्रतीक्षालय बनाएको छ । त्यही प्रतीक्षालयको एकातिर अलग्गै स्तनपान कक्ष पनि रहेको छ ।

यस्तै भित्तामा ४५ इन्चको टेलिभिजन पनि राखिएको छ ।

एक कुनामा कफी बनाउने मशिन राखिएको छ । यसका लागि दुईजना कर्मचारी खटाइएको छ । नागरिक सहायता कक्ष तथा विद्यालयहरूको अनुगमन गर्न छुट्टै कोठामा सीसी क्यामरा राखिएको छ । त्यहीँबाट इटहरीका सबै विद्यालयको अनुगमन हुने गरेको उपमहानगरले जनाएको छ । सामुदायिक विद्यालयहरूको अनुगमन प्रतीक्षालयमा राखिएको सीसी क्यामराबाट हुने गरेको जनाइएको छ । फागुन ५ गतेदेखि प्रतीक्षालय सञ्चालकमा आएको हो ।

नगरबासीलाई केही सहजता प्रदान गर्ने उदेश्यले खेर गइरहेको भवनलाई सदुपयोगमा ल्याएको नगर प्रमुख (मेयर) हेमकर्ण पौडेलले बताए । 

‘पहिला हामीले मासिक ४ लाख रुपैयाँभन्दा माथिको चियाको बिल तिर्नु पथ्र्याे,’ उनले भने, ‘अहिले पहिला व्यवस्थापनमा खर्च लागेपनि त्यसपछि पहिलाको भन्दा आधा नै कम खर्च भइरहेको छ ।’ अहिले मासिक २ लाख रुपैयाँले पुग्ने उनले बताए । 

सेवाग्राहीलाई खुसी बनाउने आफ्नो लक्ष्य रहेको मेयर पौडेलले स्पष्ट पारे ।

कर्मचारी र सर्वसाधारणले दैनिक ३७५ कप कफी पिउने गरेका छन् । हेल्प डेस्कमा बस्ने कर्मचारीहरूले आउने सेवाग्राहीलाई निवेदन फारम भरिदिने गरेका छन् । 

‘सेवाग्राहीले प्रक्रिया नबुझेको खण्डमा सबै काम हाम्रा कर्मचारीले गरी दिन्छन्,’ उनले भने ‘आफ्नो काम लिएर आउने सेवाग्राहीले अन्य केही गर्नुपर्दैन ।’ 

इटहरी उपमहानगरले झण्डै डेढ महिनायता सेवाग्राहीलाई एकीकृत सेवा प्रवाह गरिरहेको छ । विगतमा थोत्रा सामान राख्ने कोठालाई चिटिक्क पारेर उपमहानगरले सेवाग्राहीलाई खुसी बनाउन थालेको हो । 

कवाडी गोदाम भनेर राखिएको भवनलाई प्रयोगमा ल्याइएको मेयर पौडेलले बताए । उक्त भवन करिब २० लाख रुपैयाँ खर्चिएर निर्माण गरिएको हो ।

यस्तै मोरङको रंगेली नगरपालिकाले  कार्यालय परिसर (कम्पाउन्ड)भित्रै पार्क बनाएको छ । थकित भएर आएका सेवाग्राहीलाई ‘मूड फ्रेस’ गराउन पार्क बनाइएको मेयर दिलीप बगडियाले बताए ।  

‘बाटोमा रिसाएर सेवाग्राही आउँछन्,’ ठट्टाशैलीमा उनले भने, ‘कार्यकालको गेटबाट भित्र पस्नासाथ सेवाग्राही यही पार्कमा बस्छन् । अनि उनीहरूको रिस मरिहाल्छ नि !’ 

पार्क बनेपछि राति ९–१० बजेसम्म नगर कार्यालयमा आएर तस्वीर लिनेको भीड लागेको उनले सुनाए ।