‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टका मुख्यमख्य घटनाक्रमसहित उपस्थित भएका छौँ–
कर्णाली प्रदेशका मुख्यमन्त्री राजकुमार शर्मा र गण्डकी प्रदेशका मुख्यमन्त्री सुरेन्द्र पाण्डेले राजीनामा दिएसँगै बुधबार नै सम्बन्धित प्रदेश प्रमुखले बहुमतको सरकार गठन गर्न ७ दिनको समय दिएर आह्वान गरेका छन् । यस्तै सुदूरपश्चिम प्रदेशका मुख्यमन्त्री कमल बहादुर शाह र लुम्बिनी प्रदेशका मुख्यमन्त्री डिल्लीबहादुर चौधरीले बिहीबार प्रदेशसभाबाट विश्वासको मत लिँदैछन् । 

केन्द्रमा एमालेसहितको नयाँ समीकरण बनेसँगै प्रदेशमा पनि त्यसको असर परेको हो । कर्णालीका मुख्यमन्त्री शर्माबाहेक तीन वटा मुख्यमन्त्री कांग्रेसका हुन् भने शर्माले चाहिँ एमालेको भागमा कर्णाली परेपछि राजीनामा दिएका हुन् । नयाँ समीकरणअनुसार कांग्रेस नेतृत्वको सरकार जोगाउन चुनौती छ । 
००००
सुदूरपश्चिम प्रदेशका मुख्यमन्त्रीले विश्वासको मत लिने तयारी गरिरहँदा नागरिक उन्मुक्ति पार्टी (नाउपा)का तर्फबाट पक्ष र विपक्षमा मत दिन र नदिन छुट्टाछुट्टै निर्देशन (ह्विप) जारी गरिएको छ । 

पार्टीका केन्द्रीय अध्यक्ष रञ्जिता श्रेष्ठ चौधरीले मुख्यमन्त्री कमलबहादुर शाहले यही बिहीबार प्रदेशसभाबाट लिन लागेको विश्वासको मतको विपक्षमा मतदान गर्न निर्देशन दिएकी छन् ।  अध्यक्षको पत्र सार्वजनिक भएलगत्तै सुदूरपश्चिम प्रदेशसभा, नागरिक उन्मुक्ति पार्टी, संसदीय दलका प्रमुख सचेतक खुशीराम डगौराथारुले पनि मुख्यमन्त्रीले लिने विश्वासको मतको पक्षमा मतदान गर्न प्रदेशसभाका सदस्य अर्को ह्वीप जारी गरेका छन् । 
००००
अखिल नेपाल फुटबल संघ (एन्फा) ले बिहीबारदेखि सी डिभिजन सुरु गर्न लागेको छ ।  एन्फा कम्प्लेक्स सातदोबाटोमा प्रतियोगिता हुन लागेको हो भने खेलहरू आवश्यकताअनुसार च्यासलस्थित रंगशाला र त्रिपुरेश्वरस्थित दशरथ रंगशालामा पनि खेलाइने एन्फाले जनाएको छ ।
००००
चर्चित गायक राजेश पायल राईलाई प्रहरीले नियन्त्रणमा लिएको छ । 
 मादक पदार्थ सेवन गरी होहल्ला गरेको आरोपमा प्रहरीले उनलाई नियन्त्रणमा लिएको हो । 
गएराति काठमाडौँको थापागाउँबाट उनीसहित अन्य तीन जनालाई पनि नियन्त्रणमा लिइएको जिल्ला प्रहरी परिसर काठमाडौँले जनाएको छ । 
मदिरा पिएर होहल्ला गरिरहेका उनीहरुले सम्झाउँदा पनि नमानेपछि नियन्त्रणमा लिएको प्रहरीको भनाइ छ । सबैलाई प्रहरी वृत्त बानेश्वरमा राखिएको छ ।
००००
नेपाल वायु सेवा निगमले ग्राउण्डेड जहाज ९एन(एकेएक्सको मर्मत सम्भारगरी चाँडै उडान शुरू गर्ने भएको छ । १५ अप्रिलसम्म बिग्रिएको इन्जिन तयार गरी ग्राउण्डेड जहाज २२ अप्रिलभित्र उडानमा ल्याउने निगमको तयारी छ । विमान सञ्चालनमा आएपछि एउटा भाडाको इन्जिन विमानमा नै रहने र उडानसमेत नियमित हुने निगमको भनाइ छ ।
००००
सर्वोच्च अदालतले गैरआवासीय नेपाली सङ्घ (एनआरएनए) मा नेतृत्व  गरेका बद्री केसी र विनोद कुँवरसहितका सबै कार्यसमितिलाई अमान्य ठहर गरेको छ ।     
न्यायाधीश सपना प्रधान मल्ल र नहकुल सुवेदीको इजलासले विभिन्न व्यक्ति नेतृत्वको छुट्टाछुट्टै एनआरएनएको समितिलाई अमान्य ठहर गरेको हो ।
००००
नेपाली कांग्रेसका सभापति शेरबहादुर देउवाले इलाम– २ मा प्रतिनिधिसभा उम्मेदवारका लागि डम्बरबहादुर खड्का र बझाङ प्रदेशसभा–१ का लागि अभिषेक सिंहको नाम प्रस्ताव गरेका छन् । 
आफ्नै निवास बूढानीलकण्ठमा आयोजित संसदीय बोर्डको बैठकमा देउवाले खड्का र सिंहको नाम प्रस्ताव गरेको जानकारी सहमहामन्त्री महालक्ष्मी उपाध्याय डिनाले दिइन् । बिहीबारकोा बैठकबाट उम्मेदवारको टुंगो लाग्नेछ । 
००००
राष्ट्रिय सभा उपाध्यक्षको निर्वाचन यही चैत २८ गते हुने भएको छ ।  राष्ट्रिय सभाका अध्यक्ष नारायणप्रसाद दाहालले बुधवारको बैठकमा निर्वाचनको मिति घोषणा गरेका हुन् ।
चैत १५ गते उपाध्यक्ष उर्मिला अर्यालले राजीनामा दिएपछि यो पद रिक्त छ ।
००००
नक्कली भुटानी शरणार्थी प्रकरणमा थुनामा रहेका टोपबहादुर रायमाझीलगायतका प्रतिवादीले सर्वोच्च अदालतमा दिएको निवेदन स्थगित भएको छ ।
थुनामा राखी मुद्दाको पुर्पक्ष गर्ने काठमाडौं जिल्ला अदालत, र उच्च अदालत पाटनको आदेशविरुद्ध रायमाझीसहितका प्रतिवादीहरू सर्वोच्च पुगेका हुन् ।