बुटवलको सुप्रिम सहकारी ठगी प्रकरणमा पूर्वउपराष्ट्रपति नन्दबहादुर पुनका छोरा दीपेश धरौटी रकम तिर्न नसक्दा कारागार चलान भएका छन् ।

रुपन्देही जिल्ला अदालतले पुनसँग शुक्रवार ४ लाख रुपैयाँ धरौटी माग गरेको थियो ।

पुनले चार लाख धरौटी जम्मा गर्न नसकेपछि कारागार चलान गरिएको रुपन्देही जिल्ला अदालतका सूचना अधिकारी अनन्तराज मरासिनीले जानकारी दिए ।​

‘अदालतले उहाँलाई चार लाख धरौटीमा रिहा गर्न आदेश दिएको थियो, तर पुनले  धरौटी जम्मा गर्न सक्नुभएन । धरौटी रकम जम्मा गर्न नसकेपछि भैरहवास्थित जिल्ला कारागार चलान गरिएको छ’, उनले भने ।

पुनसँगै नवीन अछामीले पनि धरौटी जम्मा गर्न नसकेपछि कारागार चलान गरिएको छ । नवीनसँग अदालतले १४ लाख रुपैयाँ धरौटी माग गरेको थियो ।

अदालतको आदेशअनुसार रोशनी गुरुङ र नीता थापालाई जनही २ लाख, सहकारीका सचिव दुर्गा चापागाईँ पाण्डेलाई १८ लाख र दीपक न्यौपानेसँग ४ लाख ४५ हजार माग गरिएको थियो ।