नेपाली कांग्रेसका युवा नेता प्रदीप पौडेलले इलाम २ को उपनिर्वाचन सामान्य निर्वाचनजस्तो मात्रै नभएको बताएका छन् ।

प्रचारको लागि इलाम पुगेका पौडेलले उपनिर्वाचनले नेपालको राजनीतिक भविष्यलाई दिशा निर्देश गर्ने पनि बताए ।

‘यो निर्वाचन सामान्य उपनिर्वाचन मात्रै होइन । यो नेपालको राजनीतिक दिशा निर्देश गर्ने पूर्वजानकारी को एउटा संकेत पनि हो । यो निर्वाचनमा सिङ्गो देशको ध्यान केन्द्रित भएको छ । सबै राजनीतिक दलहरू यो निर्वाचनलाई आगामी दिनको राजनीति कसरी अघि बढ्छ भन्ने अनुमान गरेर लागि परेका छन्,’ पौडेलले भने, ‘मिडिया, सञ्चार माध्यमहरूले पनि यो निर्वाचन बाट आउने परिणामले देश कस्तो सिद्धान्त बोक्नेहरूको मनोबल बढ्छ भनेर प्रचार प्रसार गरिरहेका छन् । बुद्धिजीवी देखि आम नागरिक सम्म यो निर्वाचनले देशको ध्यान केन्द्रित गरेको छ र यो निर्वाचनको परिणामले यो देशलाई कुन मोडमा लाजन्छ बनेर बहस गरिरहेका छन् । त्यसैले यो उपनिर्वाचन हाम्रो देशको आगामी दिनको संकेत गर्ने एउटा महत्वपूर्ण घडी हो ।’

एउटा प्रतिनिधि बदल्ने मात्रै नभई कुन सिद्धान्तले जित्ने भन्ने टुंगो लाग्ने पनि बताए । 

‘यो निर्वाचनमा कसलाई जिताउने भन्ने अधिकार यहाँका आम नागरिकमा छ,’ चुनावी गठबन्धन अब सान्दर्भिक नभएको भन्दै उनले भने, ‘तपाईंले हाल्ने एउटा भोटले एउटा प्रतिनिधि मात्रै छनोट गर्दै हुनुहुन्न, यो देश कुन सिद्धान्तले अघि बढोस् भन्ने निर्णय पनि गर्दै हुनुहुन्छ ।’

इलाम पोखरा जत्तिकै पर्यटकीय स्थल बन्ने भन्दै उनले यहाँको पूर्वाधारको लागि कांग्रेसले अग्रसरता लिने पनि बताए ।

'इलाम सुन्दर र सुयोग्य छ । यो पोखरा जस्तै पर्यटनको केन्द्र बन्न सक्छ । यहाँका सडक निर्माण गरी यहाँको उत्पादन बजारसम्म पुर्‍याउन दिगो नीति आवश्यक छ । त्यो नेपाली कांग्रेसले गर्छ’, उनले भने, 'नेपाली आर्थिक विकासको नेतृत्व कांग्रेसले मात्रै गर्न सक्छ । यसका लागि कांग्रेस बलियो हुन आवश्यक छ । कांग्रेसले इलाम २ मा जित्न आवश्यक छ ।’