राष्ट्रिय प्रकृति संरक्षण कोषका सदस्य सचिव शरदचन्द्र अधिकारीले पदबाट राजीनामा दिएका छन् । 

उनले स्वास्थ्यका कारण देखाएर राजीनामा गरेको कोषका अध्यक्ष डा कृष्णप्रसाद ओलीले पुष्टि गरे । 

’बिरामी छु भनेर राजीनामा दिनुभएको हो । तर त्यो पत्र म कहाँ अहिलेसम्म आइपुगेको छैन,’ ओलीले लोकान्तरसँग भने । 

कोषका एक कर्मचारीका अनुसार सदस्य सचिवले सोमवार नै राजीनामा दिएका हुन् । 

उनको नियुक्ति गैरकानूनी रहेको भन्दै लोकान्तरले यसअघि नै समाचार प्रकाशित गरिसकेको छ । 

राष्ट्रिय सतर्कता केन्द्रले उनको नियुक्ति गैरकानूनी रहेको भन्दै उनलाई कारबाही गर्न कोषका अध्यक्षलाई निर्देशनसहितको पत्राचार गरेको थियो । 

कोषका अध्यक्षले कारबाही नगर्दा सतर्कता केन्द्रले भने अख्तियार दरुपयोग अनुसन्धान आयोगलाई फाइल पठाउने तयारी गरिरहेको थियो । अख्तियारको कारबाहीबाट जोगिनका लागि अधिकारीले अन्ततः राजीनामा गरेका हुन् ।