नेपाली कांग्रेस संसदीय दलका प्रमुख सचेतक रमेश लेखकले पुष्पकमल दाहाल प्रचण्डबाहेक अरु कसैलाई पार्टीले प्रधानमन्त्री अफर गरेर पत्र नदिएको बताएका छन् । संसदीय दलको कार्यालय सिंहदरबारमा बुधवार पत्रकारहरूसँग कुरा गर्दै लेखकले प्रचण्ड बाहेककालाई प्रधानमन्त्री अफर गरेको कुरा लगत भएको बताएका हुन् ।

राष्ट्रिय स्वतन्त्र पार्टी (रास्वपा)का नेताहरूले सभापति रवि लामिछानेलाई कांग्रेसले प्रधानमन्त्रीको अफर गरेको दाबी गर्दै आएका छन् । स्वयं लामिछानेले मंगलवार उपप्रधानमन्त्री भन्दा माथिल्लो पद अफर गर्ने पार्टीले सहकारी ठगीको मुद्दा उचालेको बताएका थिए । ‘आफ्नोे अफर मान्यो भने माथिल्लो पदका लागि विभिन्न च्यानलबाट कुरा ल्याउने । नमानेपछि भोलिपल्टदेखि गृहमन्त्रीमाथि छानबिनको कुरा उठाउने ?’ उनले प्रश्न गरे ।

अहिले फेरि प्रधानमन्त्रीको अफर आएको हो भन्ने पत्रकारको एक प्रश्नको जवाफमा लामिछानेले भनेका थिए, ‘नयाँ पनि आउला नि !’

कांग्रेसका प्रमुख सचेतक लेखकले लामिछानेलाई प्रधानमन्त्रीको अफर कहिलै नगरिएको दाबी गरे । ‘प्रचण्डजीलाई प्रधानमन्त्री एसेप्ट गरेकै हो । उहाँलाई चिठी लेखेर दिएकै हो । त्यसपछि हामीले अर्को कसैलाई दिइसकेका छैनौं,' उनले स्पष्ट पारे ।