वरिष्ठ गायिका ज्ञानु राणालाई 'दीर्घ साधाना सम्मान'

वरिष्ठ गायिका ज्ञानु राणालाई दीर्घ साधाना सम्मान प्रदान गरिएको छ । हिमालयन अन्तर्राष्ट्रिय अवार्ड-२०८० अन्तर्गत मंगलबार काठमाडौंमा आयोजित एक कार्यक्रममा राणालाई दीर्घ साधाना सम्मान प्रदान गरिएको हो । 

वुमेन्स एरा एण्ड मिडिया ग्रुप नेपालको आयोजनामा भएको अवार्डको चौथो संस्करणमा रक्षामन्त्री हरिप्रसाद उप्रेतीले राणालाई अवार्ड प्रदान गरे । 

यस्तै सिक्किमका साहित्यकार जीवन शर्मालाई ‘हिमालयन गीत/संगीत विशेष सम्मान’, चलचित्र निर्माता तथा अभिनेत्री रुश्मा राईलाई ‘हिमालयन चलचित्र विशेष सम्मान’ र वरिष्ठ साहित्यकार खेमनाथ दाहाललाई हिमालयन विशेष साहित्य साधना सम्मान’ अर्पण गरिएको थियो ।

समारोहमा पत्रकार विजयरत्न तुलाधरलाई ‘हिमालयन पत्रकारिता रजत सम्मान’ प्रदान गरिएको थियो ।  यसैगरी पत्रकार शान्तिप्रियलाई ‘हिमालयन पत्रकारिता विशेष सम्मान’, विनोद देवकोटालाई ‘हिमालयन पत्रकारिता सम्मान’ र किरणप्रसाद अधिकारीलाई मोफसल पत्रकारिता सम्मान अर्पण गरिएको हो ।

उनीहरूलाई मन्त्री उप्रेती, विशिष्ठ कलाकार वसुन्धारा भुसाल, पत्रकार एवं लेखक प्रा. पुरुषोत्तम दाहालले सम्मान प्रदान गरे ।  

समारोहमा अपांग अधिकारकर्मी जगदीशप्रसाद अधिकारी, वरिष्ठ साहित्यकार हरि शर्मा, साहित्यकार रमेश दाहाल, युवा उद्यमी मिर्जा राशिद वेग, लोकदोहोरी गायिका शर्मिला तामाङ, सुनिता नेपाली, वरिष्ठ कस्मेटोलोजिस्ट मन्दिरा खड्का र व्यवसायी अभिशेख विक्रम शाहलाई सम्मान अर्पण गरिएको थियो । म्युजिक कम्पोजर शाहस शाक्य, पत्रकार तुलसी गिरी ‘भावुक’, गायक महेन्द्रराज वराल र संजिवसिंह रानालाई जुरी सम्मान गरिएको समारोहमा पाटन प्याथ ल्याव प्रा.लि., नोर्डिक एजुकेशन कन्सल्टेन्सी प्रा.लि. र सुमन ड्राइभिङ सेन्टरलाई आभार पत्र हस्तान्तरण गरिएको थियो ।

आ-आफ्नो क्षेत्रमा विशिष्ट योगदान पुर्‍याएका व्यक्तिलाई सम्मान गर्नु आफैंमा राम्रो कार्य भएको मन्त्री उप्रेतीले बताए । 

स्रष्टा सर्जकलाई सम्मान गर्ने उद्देश्यले शुरू गरेको अवार्ड यसवर्ष पनि निरन्तरता दिएको अवार्डका अध्यक्ष अवार्डका अध्यक्ष गणेश सुवेदीले बताए । भाषा, साहित्य कला संस्कृतिका सर्जकलाई सम्मान गर्ने उद्देश्यले अवार्डलाई निरन्तरता दिइएको अवार्ड संयोजक गीता अधिकारीले बताइन् । 

वुमेन्स एरा मिडिया ग्रुपकी अध्यक्ष प्रतिमा राईले अवार्डका विषयमा प्रकाश पारेकी थिइन् ।