जितका बाबजुद लखनउ प्लेअफ दौडबाट बाहिरियो, पुछारमा सीमित मुम्बई

इन्डिउन प्रिमियर लिग (आईपीएल)मा लखनउ सुपर जायन्ट्सले मुम्बई इन्डियन्सलाई पराजित गरेको छ । शुक्रबार राति भएको खेलमा लखनउले मुम्बईलाई १८ रनले हराएको हो । 

लखनउले प्रस्तुत गरेको २ सय १५ रनको लक्ष्य पछ्याएको मुम्बईले निर्धारित २० ओभरमा ६ विकेटको क्षतिमा मात्र १ सय ९६ रन बनाउन सक्यो । टोलीका लागि पूर्वकप्तान रोहित शर्माले सर्वाधिक ६८ रनको योगदान दिए । 

खेलको अन्त्यतिर नमन धिरले २८ बलमा ६२ रन बनाए पनि टोलीलाई जितसम्म डोर्‍याउन सकेनन् । त्यस्तै, डेवाल्ड ब्रेभिसले २३, कप्तान हार्दिक पाण्ड्याले १६ तथा ईशान किसनले १४ रन बनाए ।

लखनउका लागि नविन उल हक र रवि विश्नाईले २–२ विकेट लिए भने क्रुनाल पाण्ड्या र मोहसिन खानले १–१ विकेट लिए ।

यसअघि निकोलश पुरन र कप्तान केएल राहुलको अर्धशतकको मद्दतले लखनउले निर्धारित २० ओभरमा ६ विकेटको क्षतिमा २ सय १४ रन बनाएको थियो । पुरनले मात्र २९ बलमा ७५ रनको विस्फोटक इनिङ्स खेले । 

केएल राहुलले ४१ बलमा ५५ रन बनाए । मुम्बईका लागि नुवान थुसारा र पियुष चावलाले ३–३ विकेट लिए ।

पराजयपछि मुम्बई यो सिजन अङ्क तालिकामा पुछारमा सीमित बनेको छ । १४ खेलबाट टोलीको मात्रै ४ अंक छ । लखनउ १४ खेलबाट १४ अङ्कसहित तालिकामा छैटौँ स्थानमा छ ।

यो जितपछि पनि लखनउ प्लेअफको दौडबाट बाहिरिएको छ । सीएसके र दिल्ली क्यापिटलसँग पनि समान अंकहरू छन् । चेन्नईको एक खेल बाँकी छ भने दिल्लीले सबै खेल खेलेको छ ।

अहिलेसम्म लखनउको नेट रन रेट (-०.६६७) चेन्नई (०.५२८) र दिल्ली (-०.३७७) भन्दा खराब छ । यस्तो अवस्थामा चेन्नईले खेल ठूलो अन्तरले हारे पनि लखनउभन्दा अगाडि रहनेछ । यदि खेल जिते वा रद्द भयो भने चेन्नई प्लेअफमा प्रवेश गर्ने चौथो टोली बन्नेछ ।