काठमाडौं, ११ माघ- प्रधानमन्त्री शेरबहादुर देउवाले मिर्गौला, क्यान्सर र स्पाइनल इञ्जुरीका कारण प्यारालाइसिस भएका बिरामीलाई मासिक भत्ता दिने सरकारी निर्णयले मुलुकलाई आर्थिक भार नथपिने जिकिर गरेका छन् ।

मन्त्रिपरिषद्को निर्णय कार्यान्वयनको बिहीबार शुभारम्भ गर्दै प्रधानमन्त्री देउवाले यस्तो बताएका हुन् ।

'नेपालमा क्यान्सर, मिर्गौला र स्पाइनल इञ्जुरीका बिरामीको अवस्था भयाबह छ,' प्रधानमन्त्री देउवाले भने, 'यस्ता बिरामीलाई मासिक भत्ता दिने निर्णयले कुनै आर्थिक भार पर्दैन ।'

स्वास्थ्यमन्त्री दीपक बोहोराले यसलाई प्रधानमन्त्रीको निर्देशनमा भएको निकै ठूलो कामको रुपमा व्यख्या गरे । सुर्तीजन्य पदार्थमा लगाइएको २५ प्रतिशत कर यसमा प्रयोग हुने भएकाले नयाँ सरकारलाई आर्थिक भार नपर्ने उनको जिकिर छ । 

मन्त्री बोहोराले 'यो सरकारको सामाजिक दायित्व हो' भने । 'यसमा कुनै राजनीति होइन, यो नेपाल सरकारको सामाजिक दायित्व हो,' बोहोराले भने, 'यसबाट सम्पूर्ण बिरामीले राहत पाउने छन्।' 

सो अवसरमा प्रधानमन्त्री देउवाले मिर्गौलाका १० र स्पाइनल इञ्जुरीका ६ बिरामीलाई मासिक भत्ताको चेक हस्तान्तरण गरेका थिए ।

मन्त्रिपरिषद्को पुष १३ गतेको बैठकले तीन थरीका बिरामीलाई मासिक ५ हजार दिने निर्णय गरेको थियो ।