काठमाडौं – आर्थिक वर्ष २०७४/०७५ मा अन्तिम एक दिनमा सरकारले झण्डै १६ अर्ब राजस्व संकलन गर्न सफल भएको छ ।

असार ३१ गतेको अन्तिम तथ्यांकअनुसार लक्ष्य पूरा गर्न सोमबार एकैदिनमा १५ अर्ब ७३ करोड ७६ लाख रुपैयाँ कर संकलन गर्नुपर्ने दबाब थियो । आर्थिक वर्ष २०७४/०७५ मा ७ खर्ब ३० अर्ब रुपैयाँ कमाउने लक्ष्य राखेकोमा असार ३१ गतेसम्म सरकारले कर संकलन तथा भन्सारबाट ७ खर्ब १४ अर्ब ३१ करोड ७९ लाख १६ हजार रुपैयाँ आम्दानी गरेको थियो । 

अर्थमन्त्रालयका अनुसार क्लोजिङको दिन सोमबार भन्सार तथा कर कार्यलयका कर्मचारीको भरपूर प्रयासपश्चात मध्यरातिमा राजस्व संकलनले लक्ष्य नाघेको थियो ।

असार अन्तिम दिन ३२ गते कर कार्यालयका प्रमुख तथा भन्सार कार्यालयको अथक प्रयासका कारण राजस्वको लक्ष्य छुन सफल भएको अर्थमन्त्रालयका अधिकारीहरू बताउँछन् ।  

अर्थ मन्त्रालयका प्रवक्ता झक्कप्रसाद आर्चाकाअनुसार राजस्वको लक्ष्य भेट्टाउन सोमबार अन्तिम प्रयासस्वरूप राजस्व नतिरेका ठूला करदातालाई फोन गर्ने लगायत काम गर्दै सबै कर कार्यालय भन्सारका प्रमुखहरूले अथक प्रयास गरेकै कारण एकै दिनमा ठूलो अंकमा राजस्व संकलन भएको हो ।  

‘राजस्वको पूर्ण लक्ष्य भेट्टाउन सोमबार सम्बन्धित अधिकारीहरूले ठूलो मेहनत गरे । त्यही मेहनतका कारण एकै १६ अर्ब राजस्व संकलन गर्न सफल भयौं ।’

खर्च स्रोतका लागि आन्तरिक आम्दानी करीब साढे ७ खर्ब र करीब ५ खर्ब रुपैयाँ अनुदान र ऋणबाट जुटाउने लक्ष्य प्रस्तुत गरेको थियो ।

खर्च १० खर्बभन्दा बढी

आर्थिक वर्ष २०७४/०७५ मा बजेट खर्चको लक्ष्यनजिक पुगेको छ । सो आर्थिक वर्षमा जम्मा १२ खर्ब ७९ अर्ब ७६ करोड बजेट खर्च गर्ने लक्ष्य राखेकोमा १० खर्ब ७३ अर्ब १६ करोड ३९ लाख रुपैयाँ खर्च गर्न सफल भएको हो । यो ८३ दशमलव ८६ प्रतिशत हो । 

यसमध्ये पूँजिगत तथा विकास खर्चका लागि सरकारले ३ खर्ब ३५ अर्ब रुपैयाँ विनियोजन गरेकोमा असार मसान्तसम्ममा २ खर्ब ६७ अर्ब रुपैयाँ खर्च गरेको छ । यो कूल विनियोजित रकमको ७९ दशमलव ७४ प्रतिशत हो । 

यस्तै सरकारले वित्तीय व्यवस्थापनका लागि विनियोजन गरेको १ खर्ब ४१ अर्ब रुपैयाँमध्ये १ खर्ब ९ अर्ब ६५ करोड रुपैयाँ खर्च भएको छ ।

यस्तै चालू खर्च भने ८६ दशमलव ६५ प्रतिशत (६ खर्ब ९६ अर्ब) रकम खर्च भएको छ । चालू अर्थिक वर्षमा पनि विकास खर्च निकै कम थियो । कर्मचारीको तलब सुविधा तथा हरेक वर्ष बजेट विनियोजन गर्नुपर्ने क्षेत्रको खर्च छिटो हुने गरेको देखिएको हो ।

महालेखाको तथ्यांकअनुसार सरकारले चालू खर्चका लागि ८ खर्ब ३ अर्ब रुपैयाँ विनियोजन गरेको थियो । 

असारको विकास खर्च १ खर्बभन्दा बढी

आर्थिक वर्ष २०७४/०७५ मा मात्रै एक खर्ब रुपैयाँभन्दा बढी रकम पूँजीगत खर्च भएको छ । चालू आर्थिक वर्षका लागि सरकारले विनियोजन गरेको कूल पूँजीगत बजेट ३ खर्ब ३५ अर्ब १७ करोड ५९ लाख ७० हजार थियो । यसमध्ये असार मसान्तसम्ममा ७९ दशमलव ४७ प्रतिशत बजेट निकासा भएको महालेखा नियन्त्रकको कार्यालयले जनाएको छ । 

जेठ मसान्तसम्मको तथ्यांकमा भने ४८ दशमलव ३२ प्रतिशत खर्च भएको थियो ।  असारमा मात्रै कूल पूँजीगत बजेटकोे ३१ दशमलव १५ प्रतिशत रकम निकासा भएको देखिन्छ । यसरी असारमा मात्रै कूल पूँजीगत बजेटको १ खर्ब ४ अर्ब ४० करोड ७३ लाख १४ हजार रुपैयाँ खर्च भएको देखिन्छ ।