सुर्खेत – मध्यपश्चिमाञ्चल विश्वविद्यालयका रजिस्ट्रारमा यमबहादुर कार्की पुनः पदबहाली भएका छन् ।

सर्वोच्चको आदेश अनुसार पूर्वरजिस्ट्रार डा. महेन्द्र मल्ललाई अदालतले पुस २४ गते विश्वविद्यालयको ऐन अनुसार हुने भनि आदेश दिएपश्चात् कार्कीले शुक्रवार दोस्रो पटक निमित्त रजिस्ट्रारमा पुनः पदबहाली गरेका हुन ।

पदभार ग्रहणसँगै सञ्चारकर्मीसँग कुरा गर्दै उनले आफूले राजनीतिक आस्था वा अन्य कुनै पनि आधारमा कसैलाई पनि पक्षपात नगर्ने प्रतिवद्धता जनाएका छन् ।

विगतमा विश्वविद्यालय बारम्बार तनावग्रस्त बनिरहेको बताउँदै सबैसँगको सहकार्यमा सबैको सहयोग लिएर तनावरहित विश्वविद्यालय बनाउने उनले बताए । ‘म राम्रो र गुणस्तरीय विश्वविद्यालय बनाउन चाहन्छु,’ उनले भने, ‘त्यसका लागि सबै पक्षसँग सहकार्य गर्ने र विश्वविद्यालयलाई गुणस्तरीय शिक्षा प्राप्त गर्ने थलोको रुपमा विकास गर्नेछु ।’

निमित्त रजिस्ट्रार कार्कीले विश्वविद्यालयको स्वार्थका लागि काम गर्ने बताए । ‘म व्यक्तिगत स्वार्थमा रुमल्लिने व्यक्ति होइन, न कि राजनीतिक स्वार्थमा रुमलिन्छु,’ उनले भने, ‘म कसैको कुनै स्वार्थमा परेर काम गर्ने छैन । विश्वविद्यालयको ऐन नियमअनुसार काम गर्नेछु ।’

उनले विश्वविद्यालयलाई थप गुणस्तरीय बनाउन स्थानीय राजनीतिक दल, शिक्षक, वुद्धिजीवी, विद्यार्थी सबैसँग सहकार्य गर्ने बताए । उनले आफूले हिजोभन्दा थप निष्पक्षता अवलम्बन गर्ने प्रतिवद्धता जनाए ।

आंगिक क्याम्पसका समस्या सुल्झाइने

उनले १० वटा क्याम्सलाई आंगिक क्याम्सको रुपमा छनौट गरिएको बताउँदै केही दिनमा ती क्याम्पसको समस्या समाधान गरिने बताए ।

‘आंगिक क्याम्पसमा अध्यापन गर्ने साथीहरूलाई पीडा भएको छ,’ उनले भने, ‘प्राविधिक समस्याका कारण उहाँहरू भदौदेखि अन्योलमा हुनुहुन्छ ।’ तर पनि उनीहरूका माग चाँडै समाधान गर्ने पहल भइरहेको उनको भनाई छ ।