मंसिर ३०, २०८०
बुधवार काभ्रेको धुलिखेलस्थित काठमाडौं विश्वविद्यालयका १ हजार ८३८ जना विद्यार्थीमाझ सनम ढकाल दृश्यमा आए । एमबीबीएसमा सर्वोत्कृष्ट भएर गोल्ड मेडल ल्याउँदै सनम दीक्षित भएसँगै सबैमाझ परिचित भएका हुन् । काठम...
काठमाडौं – ललितपुरको पुल्चोक सडकका सवारीसाधनको कोलाहलले भरिपूर्ण छ । मान्छे ओसार्ने माइक्रोको सहचालकले घरी ‘माइतिघर–भद्रकाली रत्नपार्क’ घरी ‘एकान्तकुना–बल्खु आवाज घन्काइरहेका छन् ।
धुलो आफ्नै हिसाबले बेहिसाब उडिरहेको छ, छिनछिनमा धुलोमा कालो धुँवा मिसिन्छ अनि नमिठो र कर्कश बास्नाले नाक चुम्न आइपुग्छ ।
सडकपेटीमा सबै यात्रुहरू आ–आफ्नै धुनमा छन्, अनि आफ्नै गन्तव्यमा हिँडिरहेका छन् । सडक दायाँबायाँ किनारामा सटरभित्र व्यवसाय गर्नेहरू आफ्नै व्यवसायमा मस्त छन् ।
टाउको माथि घुमाउँदा चोकको एउटा कुनामा गज्याङगुजुङ माकुरे जालोजस्तै तार जेलिएको देखिन्छ । तारमुनि सडकको धूलो र आफैंले फुकेको धुवाँको बीचमा १ जना अधवैंशे महिला मकै नंग्याइरहेकी छिन् । लहरै सुनको जलप लगाएका दाँतजस्तै देखिने केही थान मकैका घोंगा पोलेर ‘क्रेट’माथि बिक्रीमा राखेकी छिन् ।
नुवाकोटको घोस्याङ्ग–३ की सानुमाया तामाङ उपत्यकामा आएर मकै बेच्न थालेको ८ बर्ष भइसक्यो । पति र उनका २ छोरा ललितपुर मंगलबजारमा बस्दै आएका छन् । पैसा कमाउने र सुखी परिवार बनाउने सपनामा तामाङ र उनको परिवार उपत्यकामा आएको हो ।
कहिले थोक बजारबाट, कहिले किसानको बारीमा नै पुगेर उनले काँचो मकैका घोंगा किनेर ल्याउँछिन् । बिहान खाना खाइसकेपछि सधै डोकोभरि मकै बोकेर यहीँ पुलचोकमा आउँछिन् उनी । सानुमायाले कहिलेकाहीँ ठाउँ फेरे पनि मकै बेच्ने काम भने नियमित गरेकी छिन् ।
सानुमायाका पति घर बनाउने मिस्त्री काम गर्छन् । अचेल जेठो छोराले पनि काम गरेर आम्दानीमा सघाउन थालेको छ । सानो छोरा भने स्कूल पढ्न जान्छ । ‘हामी तामाङको खाने पिउने बानी जान्नुभएकै छ नि ! अनि पैसा त कसरी बच्छ र ?’ सानुमायाले मुस्कुराउँदै भनिन् ।
गत सालसम्म काँचो मकैको मूल्य सस्तो थियो । मकैबारीमै गएर किन्दा किसानले ११ रुपैयाँसम्ममा दिन्थे । तर १ साल यता किसान र थोक व्यापारीले काँचो मकैको मूल्यमा वृद्धि गरे ।
‘मकैको खरिद मूल्य बढेको भएपनि बिक्री मूल्यमा भने वृद्धि नभएकाले कमाइ घटेको छ,’ सानुमाया भन्छिन् । अहिले काँचो मकै खरिद गर्दा थोक व्यापारीसँग १९ र किसानको बारीमा १६ रुपैयाँ पर्छ । ग्राहकले पोलेको मकै ३० रुपैयाँमा किन्छन् । सामान्यतया दैनिक ५०–६० वटा मकै बिक्री गर्छिन् सानुमायाले । यसबाट दैनिक ४ सयदेखि ५ सय रुपैयाँ मात्रै आम्दानी हुने गरेको सानुमाया बताउँछिन् ।
हरेक वस्तुको बजार मूल्य बढिरहेको छ । उपत्यकाभित्रको बसाइ महंगो छ अचेल । तर आम्दानी भने बढेको छैन । ‘दिनभरि धुवाँधुलोसँग जुधेर मकै बेचेको पैसाले साँझ–बिहान छाक टार्न धौ–धौ हुन्छ । हुरी आउँदा काम गर्न अप्ठ्यारो हुन्छ, पानी पर्दा त व्यवसाय नै हुँदैन,’ सानुमाया गुनासो गर्छिन् ।
‘अहिलेलाई आफूले गर्न सक्ने अन्य कुनै काम देखेकी छैन,’ सानुमाया भन्छिन्, ‘हुन त हाम्रो गाउँमा गरेदेखि जे पनि हुन्थ्यो पहिला । भूकम्प गएपछि गाउँमा पानीका स्रोतहरू पनि सुकेका छन् । अब पहिलाझैं खेती गरेर खान गाह्रो छ । मकै पोल्ने काम गर्दै जाउँ क्यारे अहिलेलाई, भोलि जे पर्छ त्यहीँ गरौंला ।’
‘बाटोमा बसेर मकै पोलेर बस्ने, पैसा कमाउनु पनि छैन !’ सासुआमाले उनलाई भन्ने गर्छिन् । ‘यसरी बाटोमा मकै पोलेर बसेको उहाँले रुचाउनुहुन्न,’ डढन लागेको मकै अर्कोतर्फ फर्काउँदै सानुमायाले भनिन् ।
उमेरले ३८ वर्ष भइसकेकी सानुमाया तामाङ १५ वर्षकै उमेरमा काठमाडौंमा गलैचा बुन्ने कामका लागि आएकी थिइन् । सँगै काम गर्ने पतिसँग उनको १५ वर्षको उमेरमा विवाह भएको थियो । ‘जीवन फेरिएला भनेर काठमाडौंमा १५ वर्षभन्दा बढी दुःख गरिसक्यौं तर खान बस्न मात्रै ठिक्क छ,’ उनको गुनासो छ, ‘पहिलेजस्तो थियो अहिले पनि उस्तै ।’
यतिधेरै दुःख गर्दा पनि सानुमायाको परिवारको जीवनस्तरमा सुधार भएको छैन, यद्यपि उनलाई आफ्नो जीवनप्रति कुनै गुनासो पनि छैन ।
हँसिली, इमान्दार र परिश्रमी सानुमायाहरू समयसँगै दौडिरहेका छन्, समयसँगै शहर पनि फेरिइरहेको छ । गाउँबाट सुनौलो सपना बोकेर शहर छिरेका उनीजस्ता धेरै सानुमायाले इमान्दारीतापूर्वक मेहनत त गरेका छन्, तर दौडिरहेको समयको पदचाप पछ्याउन उनीहरूलाई गाह्रो छ । प्रत्येक पलमा पछि परिरहेका छन् ।
सपना देख्ने आँखालाई धुलो धुवाँले छपक्कै छोपेको छ, उनीहरूले बोल्ने आवाज शहरी कोलाहलमै मिसिएको छ । सानुमायाको कुरा सुन्दा सरकारको ‘समृद्ध नेपाल सुखी नेपाली’ नारा आधा कार्यान्वयन भएकोजस्तो देखिन्छ । उनी समृद्ध छैनन् तर सुखी छिन् ।
बुधवार काभ्रेको धुलिखेलस्थित काठमाडौं विश्वविद्यालयका १ हजार ८३८ जना विद्यार्थीमाझ सनम ढकाल दृश्यमा आए । एमबीबीएसमा सर्वोत्कृष्ट भएर गोल्ड मेडल ल्याउँदै सनम दीक्षित भएसँगै सबैमाझ परिचित भएका हुन् । काठम...
प्रगतिशील राजनीतिको 'फ्रन्टलाइन'मा देखिने नेताहरू जति कठोर हुन्छन्, त्यो भन्दा बढी ‘इमोसनल र सेन्टिमेन्टल’ पनि हुन्छन् । त्यस्तै ‘इमोसनल फिलिङ्स’का बाबजुद परिस्थितिले कठोर बन्दै गएक...
श्रीमान्–श्रीमती नैं शाखा अधिकृत, त्यो पनि एकसाथ । यस्तो सुखद संयोग सरकारी सेवामा प्रवेश गर्न चाहनेमध्ये कमैलाई मात्र जुर्ने गर्छ । तर, गुल्मीको धुर्कोट गाउँपालिका वडा नम्बर–६ का सुरेन्द्र पाण्डे र रमित...
भगवान् गौतम बुद्धको जन्मस्थल लुम्बिनी विश्वकै लागि शान्तिक्षेत्र हो । यो क्षेत्र आउँदो महिना विशेष हुने भएको छ । विश्वकै प्रतिष्ठित र ठूलो पुरस्कार मानिने नोबेल पुरस्कार विजेताहरूको जमघट हुने भएपछि विशेष हुन लागेक...
रोल्पाका देवराज बुढामगर गाउँकै साधारण किसान हुन् । परिवर्तन गाउँपालिका–४ पाथावाङ निवासी देवराजका ६ छोरी र एक छोरा सरकारी जागिरे छन् । छोराको आसमा ६ छोरी जन्माए देवराज र उनकी श्रीमती नन्दाले । हुन पन...
मनीषा जीसीको वास्तविक नाम विष्णु घर्ती क्षेत्री हो । गुल्मीको धुर्कोट गाउँपालिका– ३ हाडहाडेकी विष्णुलाई धेरैले मनीषा भनेर चिन्छन् । उनै मनीषा लोक सेवा आयोगले लिएका पाँचवटा परीक्षामा एकसाथ नाम निकालेर अह...
२०६२ सालपछिको कुरा हो, अख्तियार दुरूपयोग अनुसन्धान आयोगका एकजना उपसचिव र एकजना शाखा अधिकृत कम्पनी रजिष्ट्रारको कार्यालयमा सरुवा भएर गए । यति मात्र होइन, राष्ट्रिय सतर्कता केन्द्रका एक उपसचिव पनि सोही कार्यालयमा...
धेरै पहिलेको कुरा हो एक जना सज्जनका दुई भाइ छोरा थिए । उनीहरूबीच निकै मिल्ती थियो । एकपटक भगवान्ले आएर वरदान माग भनेकाले उनीहरूले अमरताको वर मागेका थिए । उनीहरूको कुरा सुनेर भगवान्ले भने– ‘...
ललितपुरको गोदावरीस्थित सनराइज हलमा नेकपा (एमाले)का दुई महत्वपूर्ण कार्यक्रम भए । एमालेको प्रथम विधान महाधिवेशन (२०७८ असोज १५ र १६ गते) सनराइज हलमै भएको थियो । विधान महाधिवेशनले विभाजनदेखि चौतर्फी घेराबन्दी...