प्युठानको ऐरावती गाउँपालिका वडा नम्बर १ को अध्यक्षमा नेकपाका दोर्णप्रसाद पाण्डे विजयी भएका छन् ।

पाण्डेले कांग्रेस उम्मेदवार अम्मर रेश्मी मगरलाई ९ मतको झिनो मतान्तरले पराजित गरे ।

पाण्डेले ६ सय ९६ मत प्राप्त गर्दा मगरको पक्षमा ६ सय ८७ मत पर्‍यो ।

ऐरावती गाउँपालिकाकै वडा नम्बर २ मा कम्युनिस्ट गठबन्धनका बागी उम्मेदवार नेकपा नेता भीमेषकुमार घर्ती मगर विजयी भएका छन् ।

नेकपाले राष्ट्रिय जनमोर्चालाई सघाएपछि घर्तीले स्वतन्त्र उम्मेदवारी दिएका थिए ।

उनले गठबन्धनका तर्फबाट उम्मेदवारी दिएका राजमो उम्मेदवार भक्तबहादुर विकलाई ३५१ मतले पराजित गरे । 

घर्तीले ८ सय ५५ मत प्राप्त गर्दा विकले ५ सय ४ मत पाए ।

घर्ती लौरो चुनाव चिह्न लिएर प्रतिस्पर्धामा उत्रिएका थिए । 

पार्टीले औपचारिक रूपमा राजमोलाई सघाएपछि उनले सूर्य चिह्न पाएका थिएनन् ।

अघिल्लो चुनावमा ११ मतले पराजित भएका घर्ती पार्टीले उम्मेदवारी नदिएपछि रूष्ट बनेका थिए ।