प्रतिनिधिसभा तथा प्रदेशसभा सदस्य निर्वाचन २०७९ अन्तर्गत कास्कीको ३ नम्बर निर्वाचन क्षेत्रबाट नेकपा एमालेका उम्मेदवार दामोदर पौडेल ‘बैरागी’ विजयी भएका छन् ।

मंसिर ४ गते सम्पन्न आमनिर्वाचनको मतगणनाको शुक्रवार बिहान घोषणा गरिएको अन्तिम मतपरिणाम अनुसार पौडेलले नेकपा माओवादी केन्द्रका उम्मेदवार रामजीप्रसाद बराललाई ५ हजार ४४५ मतान्तरले पराजित गरेका हुन् ।

पौडेलले २२ हजार ९८० मत प्राप्त गर्दा निकटतम प्रतिद्वन्द्वी माओवादी केन्द्रका उम्मेदवार बरालले १७ हजार ५३५ मत प्राप्त गरेका मुख्य निर्वाचन अधिकृतको कार्यालयले जनाएको छ ।

राष्ट्रिय स्वतन्त्र पार्टीका योगप्रसाद पौडेलले १२ हजार १८०, राष्ट्रिय प्रजातन्त्र पार्टीका जगतप्रसाद सुवेदीले २ हजार ४४२ मत प्राप्त गरेका निर्वाचन अधिकृतको कार्यालयले जनाएको छ ।

सो क्षेत्रमा विभिन्न राजनीतिक दल तथा स्वतन्त्र गरी १५ जना उम्मेदवार चुनावी मैदानमा थिए । कास्की–३ मा कूल १ लाख १ हजार ७१५ मतदाता रहेकामा ६१ हजार २८१ मत खसेको थियो ।