लाइसेन्समा लहरो तान्दा पहरो थर्किने संकेत– ४ कर्मचारीसहित ९ जना सीआईबीको हिरासतमा

नक्कली लाइसेन्स प्रकरणको छानबिनमा लहरो तान्दा पहरो थर्किने संकेत देखिएको छ ।

नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धानका क्रममा हालसम्म ९ जनालाई पक्राउ गरेको छ ।

'३ जना बहालवाला कर्मचारी, १ जना करार सकिएका पूर्व कर्मचारी, ३ जना फेक लाइसेन्सबाहक र २ जना दलाल गरी कुल ९ जना पक्राउ परेका छन्,' सीआईबीका प्रवक्ता समेत रहेका प्रहरी उपरीक्षक होविन्द्र बोगटीले लोकान्तरसँग भने, 'लहरो तान्दा पहरो थर्किनेजस्तो देखिएको छ ।'

यातायात कार्यालय बुटवलका कम्प्युटर अपरेटर नारायण पाण्डे, यातायात व्यवस्था विभागमा काम गरिसकेर अख्तियार दुरुपयोग अनुसन्धान आयोगमा सरुवा भएका कम्प्युटर इन्जिनियर सुरज प्रकाश अर्याल, विभागमा कार्यरत वृजनारायण चौधरी र करारमा काम गरेका हरिश भट्टसहित चारजना पक्राउ परेका हुन् । लाइसेन्स होल्डर लगराज कुमारसहित अन्य पाँच जना पनि पक्राउ परेको एसपी बोगटीले बताए ।

सवारी ज्यान मुद्दाका अभियुक्तलाई थुनामै रहेका बेला अवैध लाइसेन्स उपलब्ध गराएको विषयबाट अनुसन्धान शुरू भएको उनले बताए ।

यातायात कार्यालय बुटवलबाट सवारी ज्यान मुद्दामा पक्राउ परी थुनामा रहेका शशांक बस्याललाई अवैध लाइसेन्स दिएको पाइएको हो ।

त्यसैगरी, फास्ट ट्रयाकबाट लाइसेन्स दिने भनेर मास प्रिन्ट गरी हजारौं रकम लिएर विभागबाट अवैध लाइसेन्स वितरण गरिएको विषयमा समेत अनुसन्धान भइरहेको उनले खुलाए ।

'त्यसबाहेक यातायात व्यवस्था विभागबाट गठित छानबिन समितिको प्रतिवेदनलाई समेत आधार बनाएर छानबिन गरिरहेका छौं,' बोगटीले लोकान्तरसँग भने, 'कीर्ते मुद्दामा अनुसन्धान भइरहेको हो ।'

विभागबाट झन्डै ३० हजार फेक लाइसेन्स जारी भएको विभागको प्रतिवेदनमा उल्लेख छ ।

विभागले ती सबै लाइसेन्सलाई इनभ्यालिडसमेत गरिसकेको छ ।​

यो पनि पढ्नुहोस्

EXCLUSIVE: यातायातमा अहिलेसम्मकै ठूलो घोटाला– ६ महिनामा जारी भयो ३० हजार अवैध लाइसेन्स !