संघीय संसद्को बजेट अधिवेशनको पहिलो दिन राजनीतिक दलका शीर्ष नेताहरूले सम्बोधन गर्ने भएका छन् ।

शुक्रवार बस्ने प्रतिनिधि सभाको पहिलो दिनको बैठकमा दलका नेताले सम्बोधन गर्ने तयारी रहेको संसद् सचिवालय स्रोतले जानकारी दियो ।

‘अहिलेसम्म दलका नेताले सम्बोधन गर्ने तयारी छ, साढे १२ बजेपछि बस्ने कार्य व्यवस्था परामर्श समितिको बैठकपनि तय हुन्छ’, सचिवालयका एक अधिकारीले लोकान्तरसँग भने ।

अधिवेशन शुभारम्भ मन्तव्यमा दलको संसदीय दलका नेताले बोल्ने प्रचलन छ ।

संसद् बैठकमा रास्वपा सभापति रवि लामिछानेले पनि सम्बोधन गर्ने तयारी गरेका छन् । सहकारी ठगीमा संसदीय छानबिनको माग गर्दै कांग्रेसले रविलाई संसद्‌मा बोल्न दिएको थिएन ।

तर रास्वपा सभापतिको हैसियतमा अधिवेशनमा मन्तव्य राख्न कांग्रेसले अवरोध नगर्ने संकेत दिएको छ ।

प्रतिनिधि सभाको बैठक अपरान्ह ४ बजे बस्दैछ ।