सेबोन अध्यक्ष नियुक्तिमा पुनः जटिलता, प्रस्तुतीकरणमा ३ जनाको संगठित अनुपस्थिति !

पुँजीबजारको नियामक निकाय धितोपत्र बोर्ड (सेबोन)को अध्यक्षका लागि उम्मेदवार छनोट प्रक्रिया थप जटिल बनेको छ । 

अध्यक्षका लागि शर्टलिस्टमा परेका ५ उम्मेदवारलाई प्रस्तुतीकरणका लागि बोलाइए पनि ३ जना अनुपस्थित भएका हुन् । 

राष्ट्रिय योजना आयोगका उपाध्यक्ष मीनबहादुर श्रेष्ठको नेतृत्वमा रहेको अध्यक्ष सिफारिश समितिले शर्टलिस्टमा परेका ५ जनालाई बोलाएको थियो । 

आइतबार बोलाइएकामध्ये ३ जना अध्यक्ष छनोट प्रक्रियालाई नै प्रभावित पार्नेगरी नियतवश अनुपस्थित भएको देखिन्छ । अचम्मको कुरा के भने ती तीनैजना बहालवाला सरकारी नै कर्मचारी हुन् । 

धितोपत्र बोर्डका वरिष्ठ कार्यकारी निर्देशक डा नवराज अधिकारी, नेपाल स्टक एक्सचेन्जका प्रमुख कार्यकारी अधिकृत कृष्णबहादुर कार्की र बिमा समितिका पूर्वअध्यक्ष चिरञ्जीवी चापागाईं उपस्थित नभएपछि बोर्डको अध्यक्ष चयन प्रक्रिया जटिल बनेको हो । 

आइतबार धितोपत्र बोर्डका कार्यकारी निर्देशक मुक्ति श्रेष्ठ र अर्का प्रतिस्पर्धी सन्तोषनारायण श्रेष्ठ मात्रै उपस्थित भएका थिए । उनीहरूको प्रस्तुतीकरण हेरिएको समितिले जनाएको छ । 

३ जनाको संगठित अनुपस्थितिले सेबोनको अध्यक्ष नियुक्तिमा चलखेल भइरहेको आरोपलाई पनि बल पुर्याएको छ ।

निकै विवादित मानिएका नेपाल स्टक एक्सचेन्ज (नेप्से)का सीईओ कार्की सेबोनको अध्यक्ष बन्न दौडधूप गरिरहेका थिए । 

उनी अर्थमन्त्री वर्षमान पुन, अर्थसचिव मधु मरासिनी र छनोट समितिका अन्य सदस्यहरूलाई रिझाउन कम्मर कसेर लागेका थिए ।

बोर्डको अध्यक्षमा आवेदन हाल्न आउनेहरू प्रस्तुतीकरणमा उपस्थित नभएपछि अबको प्रक्रिया के हुने भन्नेमा पनि अन्योल थपिएको छ । ’अध्यक्ष चयनको प्रक्रियामा रहेको पूँजीबजारको नियामक निकायलाई नै अप्ठ्यारोमा पार्नेगरी उहाँहरू किन उपस्थित हुनुभएन, यसबारे हामी थप छानबिन गर्छौं,’ मन्त्रालयका एक उच्च अधिकारीले भने ।

मन्त्रालयको अर्को स्रोतले लोकान्तरलाई भन्यो, ’पहिल्यै सञ्चारमाध्यममा विवादित हुने गरी समाचार आएपछि आफ्नो सेलेक्सन सम्भव नहुने मानसिकताका कारण उहाँहरू उपस्थित नभएको हुन सक्छ ।’

कानूनअनुसार ५ मध्ये ३ जनाको नाम सिफारिश गर्नुपर्ने र त्यसमध्ये एकजानालाई सरकारले छान्नुपर्ने हुन्छ ।

आफू नभए अरूलाई पनि हुन नदिने नियतले ३ जना संगठित रूपमा उपस्थित नभएको हुन सक्ने मन्त्रालयको आंकलन छ । 

माथिल्लो तहमा प्रधानमन्त्री पुष्पकमल दाहाल ’प्रचण्ड’ र प्रमुख सत्ता साझेदार दल नेकपा एमालेका अध्यक्ष केपी शर्मा ओलीबीच टसल भएका कारण पनि तीनजना आज उपस्थित नभएको हुन सक्ने अर्थ मन्त्रालयकै अर्का एक कर्मचारीले बताए ।

आइतवार प्रस्तुतीकरणका लागि उपस्थित नहुनेमध्ये कार्की नेप्सेका सीईओ हुन् । उनी अर्थमन्त्री वर्षमान पुननिकट मानिन्छन् । 

उनी नेप्सेको अनलाइन ट्रेडिङ सिस्टम (नट्स) बनाउने कम्पनी ’वाईको’को एजेन्ट बनेको आरोप समेत लाग्ने गरेको छ । अन्य दुईजना पनि विवादित व्यक्ति हुन् ।

मन्त्रालयका एक उच्च अधिकारीले राजनीतिक खिचातानीकै कारण समग्र प्रक्रियालाई असफल बनाउन खोजिएको आशंका गरे । लामो समयदेखि नेप्सेको अध्यक्ष पद रिक्त छ ।