पोखरा -पाहुना टोली क्यामरुनको डिफेन्स टिम 'फेमेली'ले राजुकाजी शाक्यको च्यासल क्लबलाई झिनो गोलअन्तरले पराजित गरेको छ । छैटौं संस्करणको मनकामना केबुलकार पोखरा कप फुटबल प्रतियोगिताको दोस्रो दिन बुधबारको खेलमा पाहुना टोलीले च्यासललाई १–० गोलअन्तरले पराजित गरेको हो ।

यस सिजनमा नेपालका दुई प्रतियोगितामा पहिलो चरणमै पराजित व्यहोरेको क्यामरुनी टिमलाई पोखरा रंगशालामा भने यान्निकको एकमात्र गोल नै पर्याप्त हुँदा क्वार्टरफाइनल यात्रा सहज बन्यो ।

खेलको १२ औं मिनेटमा यान्निकले करिब २० यार्ड नजिकबाट प्रहार गरेको बलले जाली चुम्दा च्यासल पछि परेको हो । खेल सुरुवातबाटै दबाबमा परेको च्यासलले अग्ला कदका खेलाडी सामु जित निकाल्न कठिन भयो ।

२५ औं मिनेटमा इल्भासले डि–बक्स नजिकबाट प्रहार गरेको बल विपक्षी गोलरक्षक प्रिसोले पञ्च गरी उत्कृष्ट बचाउ गरे । पहिलो हाफको अन्त्यतिर इल्भासले डि–बक्सबाट प्रहार गरेको बल फष्ट बार हुँदै बाहिरिएको थियो ।

खेलको ७८ औं मिनेटतिर लगातार २ वटा पोस्ट चार्ज गरेका बिक्रम लिम्बुको बल विपक्षी गोलरक्षक डफिन्सले उत्कृष्ट बचाउ गरे । सजिन थापामगरले खेलको अन्तिम समयमा डि–बक्स नजिकबाट पाएको बल सदुपयोग गर्न भने चुके ।

करिब २० यार्ड नजिकबाट यान्निकले पोष्ट चार्ज गर्दा विपक्षी गोलरक्षक दिनेश थापामगरले बचाउ गरे । टिना र अर्मिलले पाएका केही अवसर सदुपयोग हुन सकेनन् । खेलको ३३ औं मिनेटमा क्यामरुनी टोलीले गोलअन्तर दोब्बर पार्ने अवसर गुमायो ।

सायलो मार्टिनले हानेको फ्रिकिक पावर सट बल क्रसबारबाट बाहिरियो । च्यासलले खेल अवधिभर गोलका केही अवसर गुमाउँदा अन्ततः पहिलो चरणबाटै बाहिरिन पुगेको हो । खेलमा म्यान अफ दी म्याच डफिन्सका गोलरक्षक प्रिसो घोषित भए । जितपछि डफिन्सका व्यवस्थापक आशीष थापामगरले पोखरामा फुटबलमा प्रशिक्षण मैदान अभाव भएकोले च्यासलविरुद्ध खेल सोचे जस्तो प्रदर्शन गर्न नसकेको बताए ।

अर्को खेलमा उत्कृष्ट प्रदर्शन गर्ने जनाए । क्यामरुनी खेलाडी नेपालमा सञ्चालनको तयारीमा रहेको फ्रेन्चाईज लिगमा नेपाली क्लबहरुबाट खेल्ने अवसरको रुपमा नेपाल आएको हो । च्यासल प्रशिक्षक राजुकाजी शाक्यले भने पोस्ट म्याच कन्सरेन्समा उपस्थित हुन चाहेनन् ।

आयोजक कास्की जिल्ला फुटबल संघले प्रतियोगिताको टाइसिट अझै सार्वजनिक गरिसकेको छैन । लिगपछि मोफसलका विभिन्न सहरमा प्रतियोगिता भैरहेकोले एकबाट अर्को ठाउँमा खेलाडी जाने–आउने भइरहेको छ ।

अन्य प्रतियोगिता आधारमा टिम सहभागी हुने गरेका छन् । आयोजकले विहीवारको खेल भने स्थगित भएको जनाएको छ । शुक्रबार घरेलु टिम पोखरा–११ र ब्रिगेड व्याइजबीच हुनेछ । आयोजकले विहीवार थ्रिस्टार ल्याउने तयारी गरेकोमा सम्भव नभएको जनायो ।

यसअघि उद्घाटन खेलमा हिमालयन शेर्पा क्लबलाई पराजित गर्दै थ्रिस्टार अघिल्लो चरणमा प्रवेश गरिसकेको छ । १२ टिम सहभागी हुने प्रतियोगिता २६ माघमा सकिने आयोजक संघ अध्यक्ष मिलन गुरुङले बताए । विजेताले ७ लाख ५५ हजार र उपविजेताले ४ लाख ५ हजार रुपैयाँ पाउने छन् ।