रंगून (बर्मा) - बर्मामा नेपालीहरूको बाहुल्य भएका शहर तथा बस्तीहरूमा शैक्षिक तथा साहित्यिक कार्यक्रम आयोजना गरिएको छ । 

नेपाली भाषा, साहित्य तथा शिक्षा जागरण, नेपाली जातीय चेतना, नेपाली समाजको सामाजिक अध्ययन सहित म्यान्मा–नेपालबीचको साहित्यिक तथा सांस्कृतिक आदानप्रदानको उद्देश्यले अखिल म्यान्मा देशीय हिन्दू धार्मिक संघको तत्त्वावधानमा गोर्खाली गाथाको ऐतिहासिक विरासत कायम राखी नेपाली जातीय पहिचान र अस्तित्व बोकेकाहरूले उक्त कार्यक्रम आयोजना गरेका हुन् ।  

नेपालबाट म्यन्माको भ्रमणमा सहभागी नियात्राकार युवराज नयाँघरे, भानु प्रतिष्ठानका महासचिव ऋषभदेव घिमिरे तथा पत्रकार अश्विनी कोइरालाको टोलीलाई टमू शाखाले पहिलो स्वागत गरेको थियो । 

टमूमा आयोजित कार्यक्रममा टमूका साहित्यकार रुद्र गजुरेल, अमित घिमिरे तथा शिक्षा विभाग प्रमुख कुसुम गौतमले म्यान्मामा नेपाली भाषा, साहित्य तथा शैक्षिक अवस्थितिका बारेमा विभिन्न विचार राखेका थिए । 

सोही अवसरमा नेपालबाट म्यान्मा पुगेका तीनैजना सर्जकले नेपाली भाषा र साहित्य समृद्ध पार्न सिर्जनात्मक र रचनात्मक भूमिका खेल्ने धारणा व्यक्त गरेका थिए । 

सद्भावना यात्रालाई अखिल म्यान्मा देशीय हिन्दू धार्मिक संघ केन्द्रीय समितिसँग संयोजन गर्दै नेपाली साहित्यिक परिवार टमूका अमित घिमिरेले माण्डले, यकसक, टाउँजी, मिचिना लयागतका क्षेत्रमा नेपाली जनजीवनको सामाजिक अध्ययन, साहित्यिक तथा शैक्षिक कार्यक्रम, अन्तर्क्रिया, कविगोष्ठी समेतको संयोजन गरेका थिए । 

माण्डलेमा आयोजित कार्यक्रममा नेपालबाट आएका स्रष्टालाई हिन्दू संघका केन्द्रीय अध्यक्ष सागर घिमिरे लगायतका केन्द्रीय समितिका पदाधिकारीले सम्मान रेका थिए । 

म्यान्माको राजधानी यांगौं (रंगून) मा आयोजित विशेष कार्यक्रममा म्यान्माको साहित्यिक तथा शैक्षिक स्तरोन्नति, साहित्यिक एवं सांस्कृतिक आदानप्रदान, अनुवाद संग्रह प्रकाशन आदिका बारे अन्तर्क्रिया कार्यक्रम सम्पन्न भयो ।

उक्त कार्यक्रममा साहित्यकारहरू ठाकुर गुरागाईं, विष्णु पन्थी, टेकनारायण रिमाल, धनी गौतम, प्रवीणहरि प्रधान, लक्ष्मण न्यौपाने, मोती गुरागाईं, अमित घिमिरे, चतुर्वेदी खनाल आदिले आआफ्नो विचार, धारणा र रचना प्रस्तुत गरेका थिए । 

सोही अवसरमा नेपालबाट म्यान्मा आउनुभएका साहित्यकारहरूलाई यांगौं शाखाद्वारा सम्मान गरिएको थियो । 

कार्यक्रम शाखा अध्यक्ष चित्र जीसीको सभापतित्वमा सम्पन्न भएको थियो ।