संसदमा सांसदको प्रश्न : पश्चिम सेती सुदूरपश्चिममै भएकाले काम नभएको हो ?

जेठ २७, २०७६

काठमाडौं – राष्ट्रिय सभाको बैठकमा बहुप्रतिक्षित पश्चिम सेती परियोजनालाई सरकारले प्राथमिकतामा नराखेको भन्दै सांसदले आक्रोश व्यक्त गरेका छन् ।

आर्थिक वर्ष २०७६/०७७ को बजेट बजेट वक्तव्यमाथिको छलफलका क्रममा सांसद महेशकुमार महरा ‘सुधीर’ले वर्षाैदेखि सुदूरपश्चिमका जनताले बोकेको पश्चिम सेती परियोजनालाई बजेटले सम्बोधन गर्न नसकेको बताए ।


ADVERTISEMENT

‘पश्चिम सेती धेरै पूरानो हो । किन काम शुरू हुन सकेन ? सुदूरपश्चिममै परेकाले हुन नसकेको हो ?’ उनले प्रश्न गरे, ‘अहिले थ्री गर्जजसँगको सम्झौता के भइरहेको छ ? सम्बन्धित मन्त्रीज्यूले जवाफ दिनुपर्छ ।’

सांसद महराले निर्माणाधीन महाकाली कोरिडोरमा समेत सरकारले थोरै बजेट छुट्याएको बताए । ‘महाकाली कोरिडोरमा ३२ करोड रुपैयाँ विनियोजन गरिएको छ, त्यो करीब १८ अर्बको परियोजना हो, ४ सय २५ किलोमिटर छ,’ उनले भने, ‘यसमा बढी बजेट विनियोजन गरियो भने छिटो सम्पन्न हुन्छ ।’

सरकारले सुदूरपश्चिमलाई अँध्यारोमुक्त प्रदेश घोषणा गर्ने कुरा सकारात्मक भएपनि मूर्त योजना नआएको उनले बताए । ‘यति समयभित्र अँध्यारोमुक्त बनाउने भन्नुपर्थ्यो,’ उनले भने ।

सुदूर तराईमा जेठ २३ गते राति आएको आँधीहुरीबारे संघीय सरकारले कुनै निर्णय र वक्तव्य जारी नगरेकोप्रति असन्तुष्टि व्यक्त गरिएको छ । ‘संघीय सरकारले कुनै निर्णय, वक्तव्य दिएन । सुदूरपश्चिमका जनता दुःखित भएका छन्,’ उनले भने, ‘हावाहुरी आँधीले क्षति गरेका ठाउँमा क्षतिपूर्ति र राहतका लागि ध्यानाकर्षण गराउन चाहन्छु ।’

बजेटले पूर्वाधार क्षेत्रमा सन्तुलित विकासको अवधारणा ओगट्नु राम्रो भएको सांसद महराले बताए । ‘बजेटले शिक्षा, स्वास्थ्य र मौलिक हकका कुरा बढी सम्बोधन गरेको छ । गर्भावस्थादेखि वृद्धावस्थासम्म जनतालाई हेरेको छ । भूमि बैंकको व्यवस्था गरेको छ, उद्यम गर्न जग्गा लीजमा लिन सकिने छ, यो राम्रो कुरा हो,’ उनले भने । 

जेठ २७, २०७६ मा प्रकाशित

प्रतिक्रिया दिनुहोस