पेट्रोलियम ढुवानीमा संकटको संकेत, भ्याटको मामिलामा सरकार आक्रामक

प्रतिकात्मक तस्वीर
असार ९, २०७६

काठमाडौं – मूल्य अभिवृद्धि कर (भ्याट) मा दर्ता नभएका पेट्रोलियम पदार्थ ढुवानीकर्ताविरुद्ध नेपाल आयल निगम आक्रामक देखिएको छ ।

भ्याटमा दर्ता नभएका ढुवानीकर्तालाई निगमले प्रडक्ट डेलिभरी अर्डर (पीडीओ) नदिने भएको हो । भारतबाट पेट्रोलियम पदार्थ ढुवानी गर्दा ढुवानीकर्ताले निगमबाट लिनुपर्ने स्वीकृतिलाई नै पीडीओ भनिन्छ ।


ADVERTISEMENT

सरकारले आगामी आर्थिक वर्षको बजेटमा मूल्य अभिवृद्धि कर लाग्ने वस्तुको सूचीमा पेट्रोलियम पदार्थ ढुवानीकर्तालाई राखेको हुनाले पेट्रोलियम पदार्थ ढुवानीकर्ताले अनिवार्य रुपमा भ्याटमा दर्ता हुनुपर्ने भएको छ ।

तर हालसम्म करीब १ सय वटा ढुवानीकर्ता मात्रै भ्याटमा दर्ता भएका निगमले जनाएको छ । निगमका अनुसार २ हजार ढुवानीकर्ता रहेका छन् । बजेट वक्तव्य सार्वजनिक भएपछि आन्तरिक राजस्व विभागले असार १२ गतेभित्र ढुवानीकर्ताले भ्याटमा दर्ता हुनुपर्ने र नभएमा पीडीओ नदिन निगमलाई पत्राचार गरेको छ ।

तर हालसम्म सय ढुवानीकर्ता मात्रै भ्याटमा दर्ता हुँदा पेट्रोलियम पदार्थको नियमित आपूर्तिमा समस्या आउने देखिएको छ । ‘अस्तीको बजेटले मूल्य अभिवृद्धि लाग्ने वस्तुको लिस्टमा ढुवानीकर्तालाई पनि राखिदियो,’ निगमका एक अधिकारीले भने, ‘१२ गतेसम्म भ्याटमा दर्ता हुनुपर्ने र भ्याटमा दर्ता नभएका ढुवानी व्यवसायीलाई पीडीओ नदिन भन्दै आन्तरिक राजस्वबाट पत्र आएको थियो । त्यसैको कार्यान्वयनका लागि निगमले पीडीओ नदिने भएको हो ।’

हालसम्म भ्याटमा दर्ता भएका ढुवानीकर्ताले भने पीडीओ पाउने छन् । यस्तो अवस्थामा तुलनात्मक रुपमा बजारमा पेट्रोलियम पदार्थको आपूर्तिमा समस्या पर्न सक्ने जनाइएको छ । ‘अवश्य पनि २ हजार ढुवानीकर्ताबाट हुने आपूर्ति र १ सयले मात्रै ढुवानी गर्दा केही फरक त परिहाल्छ नै,’ ती अधिकारीले भने, ‘तैपनि १२ असारसम्म दर्ताको संख्या बढ्ला कि ?’

निगमका कार्यकारी निर्देशक सुरेन्द्रकुमार पौडेलले सरकारले भ्याट कार्यान्वयन गर्न खोज्दा तत्काललाई केही असहजता देखिएपनि आपूर्तिमा समस्या नआउने दाबी गरे । ‘कतिपय यसअघि नै भ्याटमा दर्ता नै छन् । कतिपय दर्ता हुन्छन्,’ उनले सोमवार बिहान लोकान्तरसँग भने, ‘यो उद्योग मन्त्रालय र विशेषगरी अर्थ मन्त्रालयसँग सम्बन्धित विषय भएकाले उहाँहरूसँगै ढुवानीकर्ताले छलफल गरिरहेका छन् । आपूर्तिमा त्यस्तो समस्या हुँदैन ।’

त्यसबाहेक १२ गतेसम्म भ्याटमा दर्ता हुनेको संख्या समेत बढ्न सक्ने र आपूर्तिमा समस्या आउन नदिने दाबी पौडेलेले गरे । बिहीवारसम्म भ्याटमा दर्ता हुनेको संख्या बढ्नेमा आफू विश्वस्थ रहेको पौडेलेले बताए ।

तर ढुवानी व्यवसायीले तत्काल भ्याटमा दर्ता हुन नसक्ने बताएका छन् । पेट्रोलियम पदार्थ ढुवानी व्यवसायी महासंघका अध्यक्ष खगेन्द्र बोहोराले आफूहरूले भ्याटमा दर्ता हुनका लागि सरकारसँग समय माग गरेको र समय नदिए ढुवानी ठप्प हुन सक्ने समेत बताए । 

‘राज्यले लागू गर्न खोजेका नियम मान्दैनौं भन्ने होइन । हामीले मान्नुपर्छ,’ बोहोराले लोकान्तरसँग भने, ‘हामीले दर्ता हुँदैनौं भनेका छैनौं । भ्याटमा दर्ता हुनका लागि समय माग गरेका छौं । समय दिएन भने जे पनि हुन सक्छ ।’

असार ९, २०७६ मा प्रकाशित

प्रेम चन्द

पत्रकार चन्द लोकान्तरका लागि आर्थिक तथा समसामयिक विषयमा रिपोर्टिङ गर्छन् । 

लेखकबाट थप...

प्रतिक्रिया दिनुहोस