बार्सिलोना क्लबमा अहिले द्वन्द्को स्थिति रहेको बेलामा शनिवार क्लबले आइबरसँग गृहमैदानमा भिडन्त गरेको छ । 

क्लबले बार्सागेट भनिएको सामाजिक सञ्जाल विवाद भोगेको थियो र लेगानेसका स्ट्राइकर मार्टिन ब्रेथवेटलाई भित्र्याएर सानो टोलीमा धावा बोलेको भनी राष्ट्रिय तथा अन्तर्राष्ट्रिय सञ्चारमाध्यममा आलोचना खेपेको थियो । 

शनिवार खेल शुरू भएको केही समयसम्म बार्सिलोनाका प्रशंसकहरूले बोर्डप्रति आक्रोश व्यक्त गर्दै सेतो रुमाल लहराए अनि अध्यक्ष जोसेप मारिया बार्टोमेउलाई राजीनामा दिन भने । अनि आइबरका खेलाडी सर्जिओ एनरिचको गोललाई अफसाइड भनी मान्यता दिइएन । 

त्यसपछि खेलमा लियोनल मेस्सीको नियन्त्रण रह्यो र उनले पहिलो हाफमै ह्याटट्रिक गरे । त्यसले चोटग्रस्ट क्याम्प नाओलाई मलम लगाउने काम गर्‍यो । अनि उनले खेल सकिने बेलातिर चौथो गोल थपेर बार्सिलोनालाई ५–० को विजय दिलाए र क्लबलाई ला लिगाको शीर्ष स्थानमा पुर्‍याए । 

अर्जेन्टिनी सुपरस्टार मेस्सीले १४ मिनेटमा क्लबका लागि खाता खोल्न गजबको गोल गरे । उनले डिफेन्डर अनाइट्ज आर्बिलालाई नटमेग गर्दै अर्का डिफेन्डरलाई रनभुल्ल पारे अनि गोलपोस्टभित्र बल छिराए । 

सन् २०१३–१४ को सीजनपछि पहिलोपटक मेस्सीले लगातार चार खेलमा कुनै पनि गोल गर्न सकेका थिएनन् । तर पछिल्लोपटक गोल गरेदेखि उनले ६ वटा असिस्ट चाहिँ गरेका छन् । 

अनि अझ महत्त्वपूर्ण कुरा त, बार्सिलोनालाई विगत केही दिनको तनावबाट अघि बढ्न यस प्रदर्शनले मद्दत गर्‍यो । मंगलवार बार्सा च्याम्पियन्स लीगको खेलका लागि नेपोली जाँदैछ र क्लबमा भएको अव्यवस्थाले युरोपेली प्रतियोगितामा उनीहरूको सफलतालाई रोक्ने स्थिति आउन हुँदैनथियो । 

बार्सिलोनाको बोर्डले एक सामाजिक सञ्जाल कम्पनीलाई मेस्सी र जेरार्ड पिके लगायतका खेलाडीको आलोचना गर्न पैसा तिरेको भनी उठेको विवाद साम्य भइसकेको छैन । बार्साले यी सबै आरोप खारेज गरेको छ र अध्यक्ष बार्टोमेउले घटनाको विश्लेषण गरिरहेको बताएका छन् । 

मेस्सी आफैंले प्रमाणबाट के देखिन्छ त्यो हेर्ने बताएका छन् । तर अहिलेका लागि उनी र क्लबले खेलहरू जित्नु नै महत्त्वपूर्ण कुरा हो । 

आइबरविरुद्धको खेलका लागि प्रशिक्षक किके सेतिएनले लेफ्ट विंगमा आर्टुरो भिडाल, राइट विंगमा एन्टोइन ग्रीजम्यान र सेन्टरमा मेस्सीलाई राखे । ब्रेथवेटलाई बेन्चमा राखियो र शायद उनी लामै समय बेन्चमा बस्छन् होला । 

बार्सिलोनाले प्रभावशाली जीत हासिल गरेको भए पनि सेतिएनको प्रशिक्षणमा खेलाडीले सहज खेल देखाइरहेका छैनन् तर क्लबमा मेस्सी हुँदा समस्या भने छेकिन्छ । 

कप्तान मेस्सीले सर्जिओ बुस्केट्स र भिडालको राम्रो मुभको सदुपयोग गर्दै आइबरको डिफेन्सलाई चिरेर ३७औं मिनेटमा दोस्रो गोल गरे । 

त्यसको तीन मिनेटपछि उनले ह्याटट्रिक पूरा गरे । उनले ग्रीजम्यानलाई गोल मिलाएको भए पनि ग्रीजम्यानले गोल गर्ने मौका पाएनन् अनि मेस्सी आफैंले लूज बललाई पोस्टमा छिराए । 

क्लबमा भर्खर भित्र्याइएका ब्रेथवेटले ग्रीजम्यानलाई खेल सकिन २० मिनेटअगाडि रिप्लेस गरे । उनलाई प्रशंसकहरूले निकै चर्को आवाज निकालेर स्वागत गरे । 

उनले मेस्सीलाई चौथो गोल गर्नका लागि राम्रो क्रस दिए । अनि उनले हानेको बल आर्थुरतिर पुगेपछि आर्थुरले गोल गरे र क्लबको पाँचौं गोल भयो ।

बार्सिलोनालाई लीग विजयको बाटोमा लम्किनका लागि हिजोको प्रदर्शन निकै लाभदायक रह्यो ।

– गोल डट्कममा प्रकाशित रिक शर्माको रिपोर्ट

मेसी र पिकेको बदनाम गर्न बार्सिलोना क्लबको बोर्डले नै सामाजिक सञ्जालमा क्याम्पेनिङ गराएको भनिएको बार्सागेट विवादबारे पढ्न यो लिंकमा जानुहोस् :

बार्सिलोनामा चर्कियो विवाद : केही अधिकारीले मेस्सीविरुद्ध अभियान सञ्चालन गरेको आरोप