निर्माता साजिद नाडियडवालाले एउटा कथा सोचे, फरहाद सामजीले त्यसमा एउटा बकवास पटकथा लेखे अनि हलिउडको फक्स स्टारले नाडियाडवालालाई लगानी गराएर फिल्म बनायो । बागी ३ फिल्म बनाउनुको कथा यत्ति हो । 

नृत्य निर्देशकबाट फिल्म निर्देशक बनेका अहमद खानले यस फिल्मको याक्सनमा ज्यान छ भनेका थिए तर फिल्ममै ज्यान नभएपछि याक्सनलाई हेरेर के गर्नु ? 

फिल्ममा प्रहरी अधिकारी दाइलाई बचाउन भाइ आएको कथा छ जुन पचाउन अलि गाह्रै पर्छ । दाइलाई बचाउन भाइ सिरिया पनि पुग्छ र आतंकवादीहरूको फौजको सामना गर्छ । 

अनि फिल्मकी नायिकाको सियाको कुनै काम छैन । उनी नभए पनि फिल्मको कथालाई कुनै फरक पर्दैन । 

लगभग ७० करोड भारुमा बनेको बागी ३ भारतमा लगभग ४५ सय स्क्रीनमा रिलिज भएको छ । त्यसैले फिल्मको पहिलो दिनको व्यापार राम्रै हुने देखिन्छ । तर सप्ताहान्त सकिएपछि सोमवारदेखि फिल्मको व्यापार घट्न सक्छ । 

फिल्मको सबभन्दा कमजोर पक्ष नै यसको कथा हो जुन प्रेरित छ आठ वर्षअघि आएको तमिल फिल्म वेट्टाईबाट । वेट्टाईको कथालाई सिरिया पुर्‍याएपछि बागी ३ मा स्थानीयता हराएको छ । 

फिल्मको निर्देशन कमजोर छ । अहमद खानले कुनै पनि पात्रलाई राम्रोसँग स्थापित गर्न सकेका छैनन् । टाइगर श्रोफ फिल्ममा जतिखेर पनि चिच्याइरहेका हुन्छन् । रितेश देशमुखले कथाको एक मोडलाई उत्प्रेरित गर्छन् तर त्यसबाहेक उनको कुनै काम छैन । श्रद्धा कपूरले फिल्मको कथामा कुनै योगदान गर्दिनन् र यस्तो रोल लिन थालिन् भने उनले करीयरलाई कतै पनि पुर्‍याउँदिनन् । जमील खौरीको उपस्थितिले चाहिँ पर्दामा डर उत्पन्न गराउँछ । 

रद्दी कथा, झूर निर्देशन बाहेक फिल्मको गीतसंगीतले पनि दर्शकलाई बोर गर्छ । रिमिक्स गीत हालेर फिल्म निर्माताले यूट्युबमा भ्युज त पाए होलान् र फिल्म चल्दै गर्दा यी गीतले झ्याउ लगाउँछन् । 

फिल्मको याक्सन सीनहरू चाहिँ गजबका छन् । निर्देशक अहमद खानले याक्सन सीनहरू आफैंले बनाएका हुन् र उनको कला त्यहीँ मात्र देखिन्छ । तैपनि याक्सन सीनहरूले हलिउड फिल्मको झल्को दिन्छन् । वन्डर वुमन हेर्नुभएको छ भने याक्सन सीनहरु हुबहु उठाइएको पाउनुहुनेछ ।  

टाइगर श्रोफको भक्त हुनुहुन्छ भने यो फिल्म हेर्नुस्, नभए पैसा बर्बाद नगर्नुस् ।

फिल्म : बागी ३
कलाकार : टाइगर श्रोफ, श्रद्धा कपूर, अंकिता लोखण्डे, दिशा पाटनी, रितेश देशमुख, जमील खौरी आदि । 
निर्देशक : अहमद खान
विधा : याक्सन
रेटिङ : २/५