अन्तरसरकारी वित्त परिषदको बैठक सम्पन्न, सार्वजनिक खरिद ऐन संशोधन गरिँदै

अन्तरसरकारी वित्त परिषदको पाँचौ बैठक सम्पन्न भएको छ । संघीय सरकारका अर्थमन्त्री डा. युवराज खतिवडासहित सातै प्रदेशका अर्थमन्त्रीहरुको बैठक बसेको कर्णाली प्रदेश सरकारका अर्थमन्त्री प्रकाश ज्वालाले बताए ।

‘कोरोना भाइरसका कारण अर्थतन्त्रमा परेको असर बारे छलफल भएको हो,’ ज्वालाले भने, ‘भाइरसबाट परेको आर्थिक समस्या र समाधानका लागि बजेटका सम्बन्धमा छलफल भएको हो । कोभिडलाई मध्यनजर गरेर बजेट ल्याउनुपर्ने छ । अर्थतन्त्रमा असर पारेको, स्वास्थ्य क्षेत्रमा प्रदेश र जिल्ला अस्पताललाई पर्याप्त मात्रामा सशर्त छुटयाउनु पर्ने विषयमा कुराकानी भएको हो ।’

उनले स्वास्थ्य क्षेत्रलाई प्रमुख प्राथमिकता दिने, रोजगार विशेष कार्यक्रम ल्याउनु पर्ने सुझाव दिएको बताए । ‘विशेष अनुदानको बजेट कर्णाली, सुदुरपश्चिम र दुइ नम्बरमा धेरै बजेट दिनुपर्ने माग गरेका छौं,’ उनले भने ।’

मन्त्री ज्वालाले विकासको बाधकको रुपमा रहेको सार्वजनिक खरिद ऐन संशोधन गर्ने तयारी अघि बढेको कुरा अर्थमन्त्री डा. खतिवडाले बताएको जानकारी दिए । बजेटमा कर्णालीलाई प्राथमिकता दिने बचन दिएको उनको भनाई थियो ।